«Ме герой огынал. Кӱчык жапыште кӱлеш семын шке пашанам шукташ тыршена», – манеш Валентин Булыгин. Тудо Россий МЧС-ын Марий Элысе тӱҥ управленийжын Специализироватлыме пожарно-спасательный частьыштыже пашам ышта.
Валентин Йошкар-Олаште ила. Морко район Зеленогорск посёлкышто шочын. 9-ше классым тунем пытарымеке, рвезын аваже Йошкар-Оласе 21-ше №-ан школышто кадет классым чумырымо нерген уверым ужын да эргыжлан тушко тунемаш каяш темлен.
10-шо классыште тунеммыж годым В.Булыгин Юл кундем федеральный округышто эртаралтше «Юный спасатель» таҥасымашке республикысе командын еҥже семын миен, тунам Марий Элын командыже кумшо верым налын. Тылеч вара рвезе спортлан, утарышын сомылжылан утларак шӱмаҥын. Школ деч вара армийыш каен, Новосибирскыште мотострелковый войскаште служитлен.
– Армий деч вара Марий аварийный-утарыше службышто пашам ыштыше Николай Станиславович Самойлов шкеж дек пашаш ӱжын. Тудак мемнам «Юный спасатель» таҥасымашлан ямдылен, тренерна лийын. Тушто 8 ий пашам ыштенам, пытартыш кок ий сменыште кугурак семын шогенам. Ты жапыштак МарГУ-што спортфакыште тунемынам, ОБЖ да право преподаватель специальностьым налынам, – каласкала В.Булыгин. – Университетыште тунеммем годымак Российысе утарыше-влакын студенческий корпусшо нерген пален налынам. Тушко ушнышо рвезе-влак утарыше-влак коклаште эртаралтше да моло таҥасымаште шкеныштым тергат. Икымше гана ты корпусын командыж дене Липецк областьысе Елец олаш таҥасымашке миенам, нылымше верым налынна. 2016 ийыште Эльбрус курыкыш кӱзенна. Марий Эл гыч тиде командыш кок еҥым: мыйым да йолташем Иван Ведерниковым – ойырен налыныт. Тунамак мый альпинизмлан шӱмаҥынам. Тылеч вара кажне ийын иктаж-могай курыкыш кӱзена.
Тудо Марий аварийный-утарыше службын «За спасение погибающих на водах» медальже дене палемдалтын. Рвезын сменыж годым ий йымак кайыше еҥым утарымылан пуэныт.
2019 ий годсек В.Булыгин Йошкар-Олаште специализироватлыме пожарно-спасательный частьыште тырша, сержант званиян мастер-пожарный. Ӱмаште кеҥежым республик гыч 100 еҥан аэромобильный группыж дене Мордовийыш чодыра пожарым йӧрташ миен. Толмекышт, ныл кече гыч республикыштына чодыра йӱлаш тӱҥалын. Пожар тӱҥалме нерген вызов пурымо годым лач Валентинын сменыже лийын.
– Кеч-могай пожар, изи але кугу, лӱдыкшӧ. Могай могырыш мардеж пуалеш, от пале, икмыняр секундышто чыла вашталт кертеш. Пожарно-спасательный частьыш пашаш толмекем, системе мыйым пуйто терген: тӱҥалтыш ныл сменыште кажне гана пожарым йӧрташ ӱжыныт, – манеш Валентин. – Службышто коллеге-влаклан полшаш эре тыршем. Шкаланем цельым шындем гын, тушко шуаш манын, чыла ыштем. Пашаште эмоцийым, тургыжланымашым ӧрдыжеш кодыман. Вызовыште тӱрлӧ еҥ дене вашлийына, шортмыштым, кычкырымыштым, лӱдмыштым ужаш перна. Тыгай годым шкем кидыште кучыман да пашам шуктыман.
Вуйым кандараш, оккӱл шонымаш деч утлаш Валентин спортзалыш коштеш, йолташыже-влак дене вашлиеш. Рвезе у кӱкшытыш шуаш, ум пален налаш эре тырша. 2020 ийыште тудо Россий МЧС-ын пожар ваштареш кучедалме кугыжаныш службыжын Москосо академийын студентше лийын.
30 апрельыште Российыште Пожарный охранын кечыжым палемдат. Валентиным да коллегыже-влакым профессионал пайремышт дене саламлена!