Эше Кужэҥерысе школышто тунеммыж годым Алена Сабанцева организатор, вӱдышӧ сомылым шуктен, театральный постановкылаште модын.
Мураш йӧратен
Тидыжак ӱдырым И.С.Палантай лӱмеш тӱвыра да сымыктыш колледжыш тунемаш пураш кумылаҥден. Алена нине пашам чын да профессионально шукташ тунемаш тӱҥалаш манын, «Социально-культурный паша театральный творчестве» отделенийым ойырен налын.
– Мемнан пӧлкана колледжыште эн кугу. Тыште студент-влак тӱрлӧ специальность дене тунемыт: «Фото да видео-творчестве», «Актёрское искусство». Сандене колледжыштына усталык шӱлыш да кумыл эре шижалтыт.
Мыйым тидлан йоча жапыштак кумылаҥденыт. Мураш йӧратымемлан кӧра авам икымше классыште улмем годымак Кужэҥерысе сымыктыш школышко наҥгаен. Шым ийыште тӱрлӧ вокал конкурсыш миен коштынна. А 2019 ийыште уло кундем гыч чумырымо Всемарийский йоча хорышто муренам, – ойлыш Алёна.
Поэзий тӱняшке логалын
Кызыт А.Сабанцева пытартыш нылымше курсышто шинчымашым пога. Ты жапыште сценарийым возаш, тӱрлӧ ийготан еҥ-шамычлан мероприятийым организоватлаш, усталык процессым вуйлаташ тунемын. Чыла тидыж нерген Алена уло кумылын каласкалыш, тӱвыра корно дене каяш кумылжат вигак шижалтеш.
– Икымше курсышто улмем годым «Основы сценарного мастерства» дисциплиным туныктышо преподаватель Надежда Дмитриевна Денисова сценарий шотышто тӱрлӧ упражненийым ыштыктен. Мутлан, шомаклан рифмым кычалаш. Тидыже мыланем туге чот келшен шинчын да почеламутым возаш кумылаҥден. Кызыт 15 утла почеламутем уло, – манеш усталык кумылан ӱдыр.
Волонтёр
Тунемме деч посна А.Сабанцева научный конференцийлашке, вашлиймашлашке коштеш, эре ум пален налаш да опытым погаш тырша. Тыгак мер паша дечат шылын огеш код – акцийлашке да митинглашке ушна да кажне еҥын элнам тӱзатымашке надырым пыштен кертмыжлан ӱшана.
Алена – тӱвыра шотышто волонтёр. Ты паша илышыштыже кугу верым налеш. Тӱрлӧ волонтёр акцийыште еҥ-шамычлан полшен.
– Мый еҥ-влаклан полшем веле огыл, кажне татым аклаш тунемам, вет палем: икте-весылан эҥертыман. Ныл ийыште моткоч шуко форум ден фестивальлашке ушненам. Теве 2023 ийыште «Таврида» арт-кластерын «Таланты Юга России» образовательный сменыштыже лийынам. Кок ий почела «МолодЙошка» республикысе конкурсышто участвоватленам, – манеш студентке.
Сеҥымаш!
А ты кеҥежым А.Сабанцева Марий Элын делегацийже дене пырля Юл кундем округын «Метеор» форумышкыжо миен. Тушто самырык автор-влакын конкурсышт эртаралтын. Ӱдыр Шочмо эл нерген шке возымо почеламутшым лудын да 3-шо верым налын. Почеламутым возымашым тудо тыглай хобби гына огыл манеш, вет тидыже шке шонымашым, шижмашым почын пуаш, шке тӱням шочыкташ полша, лудшо еҥат тушто шкенжын шижмашым умыла.
Чолгалыкшым шотыш налын, тудын кураторжо Надежда Дмитриевна «Идалыкын студентше» Российысе национальный премийын регионысо йыжыҥышкыже ушнаш темлен. Ты конкурсын финалже 8 октябрьыште лийын. Тушто участник-влак «Еш» теме дене тестым ыштеныт, шке нерген презентацийыште каласкаленыт.
– Студент илыш – моткоч сай жап, вет мыланна ятыр корно почылтеш, у йӧн-влак палдырнат. Мылам ӱшаныше ешемлан тауштем, вет изиэм годсек авам лач шонымашке шуаш туныктен. Кокымшо ешем ик группышто тунемше ден педагог-шамыч лийыныт, нуныланат шинчымашым пуымыштлан, опытым погаш да вияҥаш полшымыштлан тау мутым ойлем, – ойла А.Сабанцева.
Ӱдыр ончыкыжымат тунемаш, кӱшыл шинчымашым налаш шона. Тыгай поро кумыл дене вашлиймаш мучаште икте-весылан ончыкылан сай ӱшаным тыланышна.
Эльвира Терентьева.