Усталыкым тергат

27 сентябрьыште 18 шагатлан, Марий самырык театрыште, «Конферансье концертных программ» смотр-конкурс тӱҥалеш.

Тыгай конкурс участник-влакын усталыкыштым, уш-акылыштым вияҥдыме, йылмыштым лывыртыме, профессиональный кӱкшытыштым да усталык мастарлыкыштым нӧлтымӧ шонымаш дене марла эртаралтеш. Тушко школлаште кугурак классласе ӱдыр-рвезе, кӱшыл да кокла тунемме заведенийласе студент-шамыч, тӱвыра тӧнежласе, музыкальный школласе, книгагудыласе пашаеҥ да усталык коллектив-влакын участникышт ушнен кертыт.

Конкурсышко кум заданийым пуртымо. «Палыме лиймаш» («Знакомство») заданий почеш, участник-влак творческий форматым кучылтын, 7 минутышто шкешт дене палдарат. «Приветственный конферанс» заданий концерт программе дене кылдалтын. А «Импровизация» заданийыште посна теме почеш выступленийым ямдылат.