Марий Турек район Арбор школым шӧртньӧ медаль дене тунем пытарымеке, Лиана Семёнова ончыкылыкшым туныктымо паша дене кылдаш шонен. Таче тудо МарГУ-н йот йылме-влак факультетыште тунемеш.
Поэзийлан шӱман
Лоп ялын ӱдыржын мастарлыкше, чолгалыкше мучашдыме. Арбор школын чапшым ятыр ий нӧлтен, тунемше-влаклан эре пример лийын. Илышыште шонымашке шуаш тырша, шке мастарлыкшым нӧлтен толеш, кажне гана сеҥыше-влак радамыш лектеш.
Лиана изиж годсек поэзийлан шӱман кушкын. Колумб лудмаште, «Живая классика» конкурсышто ойыртемалтын. Тӱҥалтыш класслаште почеламутым икымше гана марла возаш тӱҥалын гын, кугурак класслаште – рушла. Поэзий аланыште тудо шке вержым муын, чон йодмо почеш тӱрлӧ почеламутым шочыкта.
– Авам Людмила Николаевна кок почеламут сборникым савыктен луктын. Возымо мастарлык туддеч куснен, очыни. Кызыт жап укелан кӧра почеламут шагалрак шочеш. Пытартыш жапыште илышын тӱрлӧ шӧрынжӧ нерген шонкалаш, философий сынанракым возаш кумылаҥынам. Айдемын кӧргӧ чон-шижмашыжым почын пуаш мылам келша. Шочмо вершӧрлан, пӱртӱслан пӧлеклалтше икмыняр мут саскам уло.
«Ямде лий» газет дене пеҥгыде кылым эре кученам. Антонов Ивук лӱмеш премийым сеҥен налынам ыле. Районысо «Знамя» газетышке тӱрлӧ заметкым, уверым возен шогенам, – мане Л.Семёнова.
Лиана школышто тӱрлӧ олимпиадыште шкенжым терген да ончыл верыш чӱчкыдын лектын. Руш йылме да литератур дене олимпиадыште шуко гана 1-ше верым налын. Марий йылме дене 9-ше классыште республикыште 2-шо вер дене палемдалтын. Кодшо ийын англичан йылме дене районышто 1-ше лийын.
Тудо «Артекыште» «Сириус» тунемме рӱдерыште шинчымашыжым келгемден.
Англичан йылме лишыл
Лиана англичан да немыч йылмылам туныктышо лияш ямдылалтеш. Ӱдыр студент пагытын ямжым акла, занятийыш куанен коштеш, жапымат веселан эртара. Мураш-кушташ тале улмыжым «Арбор вел» ансамбльыш коштмыжо пеҥгыдемда. Тений тудо вузысо «Марий мурсем» ансамбльын коллективышкыже ушнен.
– Ешыштем шукын туныктышо улыт. Сандене мыланем ты профессий эре лишыл лийын. Кушко шоненам, тушкак пурен кертынам. Садлан мыланем тыште шинчымашым налаш келша. Йылмым келгын шымлена, грамматикым, фонетикым тунемына.
Мый кушташ пеш йӧратем. Шкенан «Арбор вел» ансамбльышкына изиэм годсек коштынам. Татарстаныш, Киров кундемыш, Крымышке миен шуынна. Тений «Марий мурсем» ансамбльын участницыже лийым. Мыйын гай икымше гана толшо ӱдыр-рвезе-влак шукын улыт. Марла мурен да куштен, мыйын чонем кана, репетиций гыч эре куанен гына каем, – мане Л.Семёнова.
Лиана шочмо калыкшым йӧрата, марий тӱвырам аклен ила. Марий шӱлышан койышыжо кеч-куштат палдырна. Тений кеҥежым Сардаялыште Марий самырык тукым слётышто лийын, шуко ум пален налын, йолташ-влакым муын. Кызыт Лиана шуко жапым тунеммылан ойыраш тырша, но йӧн, жап лектыт гын, тӱрлӧ конкурсыш ушнаш тырша.
Лианалан умбакыжат тыгаяк чолга лияш, ончыко каяш, у сеҥымашыш шуаш тыланем.
