А.Мельниченкон фондшо йоча-влаклан Российысе VI научный конкурсым увертарен. Тудо Российысе науко академийын полшымыж дене эртаралтеш. Наукышто, шымлымаш пашаште талантан йоча-влакын моштымашыштым шекланаш да тудым вияҥдаш полшаш ышталтын.
Конкурсыш элнан тӱрлӧ регионжо гыч икшыве-влак шке разработкыштым колтен кертыт. Тушко естественно-математический наукылан да шымлымаш пашалан шӱман 5-11-ше класслаште да 1-2-шо курслаште тунемше студент-влакын проектыштым вучат. Ӱмаште, мутлан, конкурсыш элнан 45 регионжо гыч 300 утла шымлымаш, инженерный да IT 45 проект пуреныт.
Палемдыман, ты конкурсын лауреатше-влаклан вузыш тунемаш пураш полшат. Кугыжаныш единый экзаменын результатышкыже ешартыш баллым пуат. Конкурс кок йыжыҥан. Икымше йыжыҥ 13-30 ноябрьыште А.Мельниченкон рӱдерыштыже лиеш. Тушто ойыртемалтше паша-влакым кокымшо йыжыҥлан ойырат. Финал 24 февральыште лиеш. Тушто сеҥыше да призёр-влакым палемдат. Нунын пашаштым илышыш шыҥдараш грантым пуат.
Конкурсыш ушнаш кумылан-влаклан 6 ноябрь марте DNK@aimfond.ru электрон почтыш йодмашым колтыман.