Национальный сымыктыш гимназийын тунемшыже-влак М.Шкетан лӱмеш кугыжаныш драме театрыште Марий Эл Республикын калык сӱретчыже И.Ямбердов дене изирак мастерскойыштыжо вашлийыныт. Иван Михайлович сӱрет паша шотышто гына огыл, тунеммаш, илыш нергенат шуко оҥайым каласкален. Тылеч вара тунемше-влак театр мучко экскурсий дене эртеныт, музейыште лийыныт. Тыштак лӱмлӧ композитор Сергей Маков дене ваш ужын мутланаш йӧн лийын.
Ушештарена: гимназийын тунемшыже-влаклан тыгай вашлиймаш республикын тӱвыра, печать да калык-влакын пашашт шотышто министр К.Ивановын темлымыж почеш Марий калык конгресс дене пырля эртаралтеш. 14 апрельыште «Писатель да жап» лӱман икымше вашлиймаште Марий калык конгрессыште шогышо писатель-влак Юрий Соловьев («Марий книга савыктыш пӧрт» ГУКП директор), Александр Петров (республикысе Кугыжаныш Погынын пашаеҥже) да журналист Эдуард Иманаев («Кугарня» газет» ГУКП директор) лийыныт.
Творческий пашаж нерген каласкалышыжла, Ю.Соловьев Марий Элыштына пытартыш жапыште савыкталт лекше книга-влак дене палдарен, икмыняржым школлан, гимназийыште тунемше-влаклан пӧлеклен, ик оҥай ойлымашыжым лудын ончыктен.
А.Петров сылнымутан произведенийым возымаште тудлан пуйто ала-могай юзо вий полшымо нерген ойлен. «Йӱдым ма, кечывалым шонымаш-влак ушыш толын лектыт, вашкерак сералтен кодем, жапем лийме семын ешарен возем» манын.
«Кугарня», «Ямде лий» газет-влакым лукмо ойыртем дене Э.Иманаев палдарен, тыгак мер илыш дене кылдалтше-влакын калыклан могай пашам шуктымышт нерген ойлен.
Вашлиймаште йоча-влак поснак куандареныт: «мален», «коракым шотлен шинчыше» лийын огытыл, уна-влакым тӱткын колыштыныт, шуко йодышым пуэденыт, почеламутым лудыныт.
‒ Кушкын шумекына меат тендан гаяк пашам ыштымашке чолган ушнынена, ‒ куандареныт тунемше-влак.
Тунемше ден лӱмлӧ еҥ-влакым вашлиймашыш чумырышо Э.Петрова (тудо Марий калык конгресс исполкомын еҥже, Национальный искусство гимназийын шочмо йылмым да литературым туныктышыжо) чылалан таушта да тыгай усталык шӱлышан уна-влакым эре школыштына вучена, ӱжаш тӱҥалына манын ӱшандарен ойла.
