1 майыште «Культура для школьников» проект почеш «Летопись сердец» патриотический акций тӱҥалын. Тений тудо Кугу Отечественный сар годсо сценысе сымыктыш илышлан пӧлеклалтын.
Кугу Отечественный сар годым элыштына театр-влак фронтысо бригаде-влакым чумыреныт, армийыште, тылыште улшо-влак ончылно выступатленыт.
Акций почеш видеоролик-влакым ямдылыме. Тушто сар жапыште театрын кузе илен лекташ полшымыжо, тыгак театр-влакын кузе пашам ыштымышт нерген каласкалалтеш.
1-10 майыште тунемше-влак «ВКонтакте» соцкылыште #9маякдш хэштег дене усталык пашаштым кум номинаций дене: «Школысо театр», «Вокал», «Танец» – аклаш луктыныт.
30 эн сай пашам «Культурадляшкольников.РФ» порталыш вераҥдат.