Пытартыш жапыште марий йылмым шочмо йылме семын тунемше-влак шагалемме нерген колаш логалеш. Тидын годымак тӱрлӧ калык гыч лекше самырык ӱдыр-рвезе-влак коклаште шочмо йылме да тӱвыра дене кугешныме кумыл палдырна. Ты шотышто марий ӱдыр-рвезе-влакат моткоч чолга улыт. Поснак Марий Эл деч тораште илыше-влак дене палыме лиймеке, мутланымеке, кумыл нӧлтеш. Кызыт ӱдыр-рвезе-влак мер ушемым чумырат, тунеммаште, пашаште, интернетыште шке калыкыштым да йылмыштым чапландараш тыршат.
Теве Удмуртийыштат республикысе самырык марий ӱдыр-рвезе-влакын «Ӱжара» мер ушемышт уло. Ты ушемын ик чолга еҥже – Ольга Хайретдинова. Оля – моткоч тыматле, поро ӱдыр. Очыни, тыгай койыш марий калыклан поснак келшен толеш. Оля дене палыме лияш, тудын дене мутым вашталташ йӧн лие. Ӱдыр мыланна шке шочмо верже, ешыж нерген чон почын каласкалыш:
– Мый Пошкырт кундем Янаул район Почиҥга (Новый Сусадыбаш) ялыште шочынам. Ешна кугу, кум изам да кум акам улыт, мый шкеже шымше шочынам. Авам марий, ачам удмурт. Ешыште ме утларакше марла мутланена, садлан мый марий йылмым изинек палем. Даша акам лудаш-возаш пеш ондак туныктен. Тидлан кӧра школыш мыйым вигак кокымшо классыш налыныт. Ик ий гыч ме ешге Удмуртийыш илаш куснышна. Кызыт Кама эҥер серыште верланыше Шолья посёлкышто илена.
– Школ пагытет тыштак эртен?
– Шолья школышто тунемме пагыт чоныштем моткоч поро шарнымашым коден. Тыште мый баскетбол ден волейбол секцийлаш коштынам, тӱрлӧ спартакиадыш, таҥасымашыш ушненам. Школысо активист-влак ушемыште лийынам, мероприятийлам эртараш тунемынам. 10 ияш гычак Шолья тӱвыра пӧрт пеленысе «Ший памаш» ансамблыште мурен-куштенам. Икманаш, изинек сценысе илышлан тунемынам. Йоча-влакым моткоч йӧратем. 13 ияш гыч 17 ияш ммарте кеҥеж пагытыште йоча лагерьыште вожатыйлан пашам ыштенам. Мый чыла вере чолга лияш тыршенам.
– Очыни, тидак ончыкылык профессийым ойырен налаш полшен.
– Тӱвыра илыш мылам лишыл лийын. Садлан ты сферыштак профессиональный шинчымашым налме шуын. Акамын темлымыж почеш Ижевск оласе Удмурт Республикысе тӱвыра колледжыш тунемаш пуренам. Тений «Организатор культурно-массовых мероприятий и театрализованных представлений» квалификаций дене дипломым налынам.
– Профессиет тачысе илышыште моткоч кӱлешан.
– Эн тӱҥжӧ – ты паша чонемлан лишыл. Усталык йолагай койышым ок йӧрате. Садлан ты профессийыште эре уым кычалше, тӱрлым шонен луктын моштышо, чулым, икманаш, творческий шӱлышан лийман. Пайремым эртарыме деч ончыч сценарийым возыман, ала-мом оҥайым, сайым шонен лукман. Мый тыгак пайрем верымат сӧрастарем. Чыла тидыже моткоч келша.
– Тылеч посна йӧратыме сомылет-влак улыт?
– Гитар дене шоктем. Изиэм годым изамын шоктымыж почеш мурем ыле. Колледжыште тунеммем годым ты семӱзгар дене шкеат «йолташ» лийынам. Гитарым шоктен мураш моткоч келша. Яра жапыште марий ӱдыр-рвезе-влакын «Ӱжара» мер ушемышкышт коштам. Тушто ме самырык-влак коклаште марий тӱвырам вияҥден колтымо пашам шуктена, тӱрлӧ мероприятийым пырля эртарена.
– Лудшына-влаклан могай тыланымашет уло?
– Шочмо йылмыдам, калыкдам пагалыза, тукым вождам палыза да шарныза. Марий улмыда дене кугешныза!