Марий эстрадыште у мурызо-влак койын ешаралтыт. Кажныже ойыртемалтше, ныжыл йӱкан, талантан. Шернур район Кугэҥер ялыште шочын-кушшо, И.С.Палантай лӱмеш тӱвыра да сымыктыш колледжыште семӱзгар-влак пӧлкаште 2-шо курсышто тунемше Александр Коноваловын «Омо дене огыл» мурыжо шукерте огыл лектын.
Изиж годсек мура
Тыматле, поро кумылан рвезын тӱрлӧ могырымат усталыкше палдырна. Мура, кушта, семӱзгар дене сайын шокта. Тудо Советский район Вечын аграрно-строительный техникумышто автомеханиклан тунем лектын, варажым илыш-корныжым тӱвыра дене кылдаш шонен. 2017 ийыште тудын гитар дене шоктымо «Шара шинчан таҥем» мурыжо калык коклашке лектын. Варажым тудо Марий Эл радиошто ик гана веле огыл йоҥгалтын. Но тунам тӱрлӧ амаллан кӧра у мурызо тӱҥалме пашажым ӧрдыжыш коден. Ынде ты сомыллан уэш пижын. Репертуарыштыже улшо кок мурыжо ончыкылклан сай ӱшаным сӧра.
Александр 1-5-ше класслам Койсола школышто, варажым 6-9-ше класслам Мустай школышто тунемын. Изиж годсек мураш йӧратен.
– Йочасадыш коштмо годсек мурем. Сценышке 6-7 ияш улмем годым лектынам. Школысо тӱрлӧ мероприятийыште, клубысо концертыште выступатленам. Районысо тӱрлӧ конкурсышто шке вием терген онченам. 2008 ийыште «Таланты без границ» йот йылмыла дене мурымо районысо конкурсышто икымше вер дене палемдалтынам, –мане тудо.
Тӱрлӧ ансамбльыште
Александрын тукымыштыжо усталык шӱлышан еҥ-влак шагалын огытыл. Поснак ачаж велым мураш-кушташ йӧратат. Рвезын ачаж ден аважат жапыштыже Койсола тӱвыра пӧртысӧ «Ӱжара» ансамбльышке коштыныт. Сашат – ты ансамбльын чолга участникше.
– Кушташ изиэм годсек йӧратем. Школышто тыгай кружокыш, вара шкенан йоча ансамбльыш коштынам. А «Ӱжара» ансамбльышке мый 15 ияш годым толынам. Концерт дене тӱрлӧ районышто лийынна. Варарак Шернур тӱвыра пӧртысӧ «Пӧлек» ансамбльын коллективышкыже ушненам, – ойла А.Коновалов.
Семӱзгарлан шӱман
Семӱзгарлан Александр Вечын аграрно-строительный техникумышто шӱмаҥын. Тунам кидышкыже икымше гана гитарым кучен да шокташ чот кумылаҥын. Моштыде, палыде чылт шке семын гитарым перкалаш тунемын. Лач ты жапыште шуко семым шонен луктын, муро-влакым ямдылен.
– Гитарым шкенан ял рвезе гыч йодынам. Ното-влакым пален омыл, кузе шижынам, туге шоктенам. Тунем шумеке, Интернетыште кузе чын шоктышашым ончен лектынам. Варажым тӱшкагудышто кок рвезым гитар дене шокташ туныктенам. Мурым возаш тӱҥалынам. Семым луктам да тудын почеш вигак шомакым кычалынам. Тыге иктаж 10 наре мурым ямдыленам. Но чыла мурым ик семын ямдылаш огеш лий. Тидлан кумыл рудалтыш (вдохновений) кӱлеш. Икте дене ик-кок кече шинчылтынам, а весым, мутлан, 15 минутышто возен шуктенам. А кызыт мый утларакшым семым возкалем.
Варажым тӱшкагудышто пырля илыме йолташем-влаклан мурен ончыктенам. 20 ияш улмем годым гармоньлан шӱмаҥынам. Шернур тӱвыра пӧртышкӧ аккомпаниатор Алексей Горинов деке шокташ тунемаш коштынам, – каласкала Александр.
Вечын техникумым тунем лекмеке, тудо армийыште служитлен. Варажым тӱрлӧ вере пашам ыштен. Шернур сырзаводышто оператор лийын, Москошто, Озаҥыште тыршен, пытартыш жапыште Ростелекомын Шернур посёлкысо филиалыштыже электросвязь шотышто инженер лийын.
А кызыт тудо студент радамыште.
– Семӱзгарлан шӱман улмемлан кӧра 2019 ийыште И.С.Палантай лӱмеш тӱвыра да сымыктыш колледжышке семӱзгар пӧлкашке аккомпаниаторлан, туныктышылан тунемаш пуренам. Тыште баян, гармонь, балалайке, домра, пианино, шиялтыш, шӱвыр, жалейке дене шокташ тунемына. Кажне семӱзгарже дене кузе шоктышашым умылет гын, пашам ышташ куштылго. Теве «Памаш шинча» шкенан оркестрыштына контрабас дене шоктем. Ты оркестр дене ме Российысе тӱрлӧ конкурсышко лектын коштына, – ойла рвезе.
Александрын шонымашыже шуко. Кызыт тудо республикысе «Ший памаш» конкурсышко ушнаш ямдылалтеш. Ӱшанена, ончыкшымат усталык пашажым тӱзатен толеш, репертуаржым пойдара, калыкым у муро дене куандара.