Усталык ешеш кушшо Элла

Шукерте огыл волгыдо але ӱжара манмым ончыктышо Элла лӱман ӱдыр дене палыме лийым. Тудо Пошкырт кундемыште эртаралтше «Говорим стихами» флешмобышто шке возымо «Ялем» да «Ачаем» почеламутшо-влакым лудын ыле.

Э.Салиева Пошкырт кундем Караидель район Шопкер ялыште шочын. «Почеламутым шукерте огыл возаш тӱҥалынам, кызытеш кумыт гына уло. – ойла ӱдыр. – 2016 ийыште ачайна колен колтыш. Тылеч вара йӱдым мален кертын омыл. Ушышко тӱрлӧ шонымаш пурен, да ачаемлан пӧлеклалтше почеламут шочо. Айдеме ила-ила, ончыкылыклан планым ышта, а ик татыште тудын ӱмыржӧ кӱрылтеш. Ачам нефтяниклан пашам ыштен. Кызытат южгунам шӱм-чоным кӱрыштмӧ годым почеламут корно-влакым сералтем».

Школышто тунеммыж годымак Элла мураш-кушташ кумылаҥын, «Ший оҥгыр» ансамбльыш коштын, кушташ тунемын. Ансамбльым вуйлатыше Н.А.Салиева – икымше туныктышыжо. Аваже Эмма Алексеевна – Башкортостан Республикысе тӱвыран сулло пашаеҥже. Шопкер ялысе тӱвыра пӧртым кумло кокымшо ий вуйлата. Тыгак тудо калык лӱмым нумалше «Ший памаш» фольклор ансамбльын художественный вуйлатышыже. Сандене Элла тышке кошташ тӱҥалын. Такшым ӱдыр аваж дене пырля сценышке вич ияшыж годымак лектын. Варажым коллектив дене пырля шочмо Караидель районышто веле огыл, Мишкан, Калтаса, Кушнаренково, Бурай районлаште, Уфа, Пӱрӧ да моло олалаштат выступатлен. Ансамбльыш Денис изаже ден Мария акажат коштыныт.

9-ше класс деч вара Э.Салиева Пӱрӧ оласе медико-фармацевтический колледжыш тунемаш пурен. Икана оласе тӱвыра полатышке Эллам Лумӱдыр лияш йодыныт улмаш. Тиде усталык паша тудлан путырак келшен. Тунам Йӱштӧ кугызан рольжым мурызо Сергей Байназов келыштарен. Тылеч вара Элла «Эн сай» куштышо ансамбль дене (вуйлатышыже – А.Шуматова) палыме лийын. Ты коллектив дене пырля марий, руш, пошкырт куштымаш-влакым тунемын да выступатлен. Тыгак тӱрлӧ конкурслаште участвоватлен, куштен веле огыл, сценкылаште модын.

А вара 2017 ийыште Валера тукым изажын сӱанжым мурызо Валерий Садретдинов вӱден. Тудо ӱдырын сайын мурымыжым колын да Пӱрӧ оласе тӱвыра пӧртыш мияш ӱжын. Тудын мурымыжым эн ончыч колыштыныт да «Ола» ансамбльышке налыныт. Варажым сценышке мураш лектын, южгунамже шкетынат.

Самырык еҥ Уфасе ик аптекыште пашам ышта. «Молан лач фармацевт лияш шонен пыштенат?» – йодым Э.Салиева деч.

«Ош халатан ӱдыр моткоч сайын коеш. Изиэм годсек ош халатым чияш да еҥ-влаклан полшаш шонен иленам. Эше кузе эм дене пайдаланаш кӱлмым сайынак пален налме шуын», – вашештыш ӱдыр. Олаште ила гынат, чӱчкыдынак ялышкыже кудалыштеш. «Шӱм-чонем ялем дене пырля. Авамым миен ӧндаламат, куштылго лийын кая», – ойла Элла. Такшым Элла эше вес направлений, иктаж управленческий дене тунемаш кайынеже. Тек волгыдо шонымашыжевлак шукталтыт!

Ӱдырын альбомжо гыч налме фото.