Усталык дене куандарыше еш

Вероника Корчемкинам (ӱдыр фамилийже Сидоркина) ме мурызо, почеламутым да мурым возышо семын палена.

ПОЭЗИЙ КУМЫЛ

Почеламутым визымше классыште тунеммыж годым возаш тӱҥалын. Серымыже ондак «Ямде лий» газетыште лектеден, вара – «Марий Элыште», «Кугарняште», «Ончыко» журналыште. Йӧратымаш лирике дене пырля поэзий аршашыштыже шочмо пӱртӱсшӧ нерген мут поянлыкым шочыкта. Сылнымут аланыштыже тыгак шочмо йӱла, ача-ава нерген теме-влак лывыргын почылтыт.

Вероника Корчемкина мыланна «Ачамлан», «Рошто», «Сӱан толеш», «Авамын ваштарже», «Нигӧ дечын шерге», «Танюшем», «Ужнем чуриетым» да моло мурыжо дене палыме. 2000 ий 14 апрельыште тудо Йошкар-Олаште эртыше марий авторский муро фестивальыште «Мале, ӱдырем» муро дене 1-ше верым налын.

Тудо Морко район Ӱшӱттӱр ялыште 1966 ий 21 июльышто шочын. Кандаш ий Изнурысо, кок ий Зеленогорскысо школлаште тунемын. Луымшо класс деч вара, 1983-1988 ийлаште, Н.К.Крупская лӱмеш Марий кугыжаныш пединститутын филологий факультетышкыже руш йылме да литературым туныктышо лияш шинчымашым поген. 1993 ий марте Морко посёлкысо 1-ше, 2-шо номеран школлаште туныктен. 1993 ийыште У Торъялыш марлан лектын. Ятыр ий тиде кундемысе школлаште туныктен, куд ий райрӱдын туныктымо пӧлкаштыже методистлан ыштен. Ынде У Торъялысе «Теремок» йочасадыште воспитательлан тырша.

ПИАЛЖЫМ МУЫН

В.Корчемкинан сем йогынышто икымше ошкылжо Морко тӱвыра пӧртысӧ Михаил Александровын вуйлатыме «У муро» эстраде ансамбль гыч тӱҥалын. Лач туштак ӱдыр У Торъял гыч мурым возаш толшо рвезе Вячеслав Корчемкин дене палыме лийын. Марлан лекмек, паша вержым вашталтен.

Пелашыж дене коктынат У Торъял районысо школлаште туныктышылан тыршеныт. Яра жапыште самырык автор почеламутым, ойлымашым, йомакым возен. Пелашыже семым шочыктен, мурылан аранжировкым ыштен. Вячеслав тунам кӱчыкрак фильм-влакымат сниматлен. Мӧҥгыштыштак звукозапись студийышт лийын.

Творческий шӱлышан кок еҥын пашаже чӱчкыдын калык ончылно кӱкшын аклалтын. Нуно тӱрлӧ авторский муро конкурсышто мастарлыкыштым тергеныт да эре манме гаяк сеҥышыш лектыныт.

ИКЫМШЕ МУРО

Тӱвыра аланысе икымше ошкылжо нерген мурызо тыгерак каласкала:

1991 ийыште «Ачамлан» икымше муро шочын. Илышыште икшывылан ава лишыл гынат, илыш йогын мемнам вестӱрлынрак савырен. Авам Ангелина Михайловна Сидоркина руш ешыште шочын-кушкын. Ачамлан ялыш марлан лекмек, пеш вашке марла кутыраш тунемын. Марий йӱлам, йылмым эреак пагален. Ӱмыржӧ мучко Морко район Изнур школышто руш йылме ден литературым туныктен. Уло вий-куатшым тунемше-шамычлан пуэн. Илаш да илаш веле ыле. Тазалыкше начареммылан кӧра ятыр ий черле киен, ӱмыржӧ кӱрылтын. Ачам ялыште шкет илен. Ме ешыште кум йоча кушкынна. Ешаҥмек, чыланат тӱрлӧ вере иленна. Ялышке кертме семын полшаш коштынна гынат, ачамын шкетак кодмыжым эре чаманен онченам. Чон ойгем мурым шочыктен. Изнурысо клубышко концерт дене мийыме годым ачамат залыште лийын. Сцене гыч тудын деке волен, мурысо шомак семынак чал ӱпшым ниялтенам. Ачамын кумылжо тунам моткоч тодылалтын. Вара икмыняр ий гыч тудым У Торъялыш шке декем илаш конденам.

КЕЛГЕ ШИНЧЫМАШ ДЕНЕ КУАНДАРАТ

Корчемкинмыт ешыште поро шӱлыш вӱдылалтеш. Нуно унам тыматлын вашлийыт. Икшывыштым шыма койыш-шоктышаным ончен кушташ тыршеныт. Изинек нуным сылнымутлан, музыклан, сымыктышлан шӱмаҥденыт. Йоча-влак, ача-аван усталыкыштым ончен, нунын гае чолга лияш тыршат.

Аня ден Маша У Торъялысе Э.Сапаев лӱмеш сымыктыш школышто ешартыш шинчымашым погеныт, фортепиано дене шокташ тунемыныт, тӱрлӧ концертыште выступатленыт. Сценыште шкеныштым чулымын кученыт. 2006 ий ноябрьыште Йошкар-Олаште «Мыйын ешем – мыйын кугешнымашем» республикысе конкурсышто нунат ача-ава дене пырля шке мастарлыкыштым ончыктеныт. Жюри Корчемкинмытым тунам «Золотые голоса» номинацийыште кӱкшын аклен.

Кугешнен палемдыме шуэш, Вероникан ӱдыржӧ-влак школышто эреак келге шинчымаш дене ойыртемалтыныт. Сымыктыш школысо фортепиано классымат, У Торъял кыдалаш школымат нуно чыла визытан отметкылан тунем пытареныт.

Аня кызыт Кировысо кугыжаныш медицине университетыште 5-ше курсышто врач-терапевтлан шинчымашым пога. Чолга студентке тунемме верыштыже яра жапым пайдалын кучылтеш. Почеламутым сера, семым келыштарен, мурым шочыкта. Шке пашажым концертлашке лукташ тырша.

Адакшым Аня тӱрлӧ конкурсышто аважын репертуарже гыч марла мурым мура, ончаш толшо калыкым куандара. Очыни, тыгай усталык ача-ава вӱр гыч шыҥа. Вет ачашт Вячеслав Андреевич Корчемкин МарГТУ-што тунеммыж годым «ТОНУС» эстраде группым чумырен. Рушла возымо почеламут-влаклан семым шке келыштарен. Эсогыл тудын мурыжо-влакым всесоюзный радиошто йоҥгалтареныт.

Вероника Николаевнан Маша ӱдыржӧ Волгатехыште 2-шо курсышто инженер-программистлан тунемеш. Изинек сӱретлаш йӧрата. Мӧҥгыштыжӧ студенткын шуко пашаже ешым куандара. ВКонтакте соцкылыште чолга ӱдырын комиксше-влакым ончен ӧраш веле кодеш. Усталык аланыштыже тудо моткоч оҥай герой-влакым шочыкта.

АВА, ВОСПИТАТЕЛЬ

2008 ийыште кок йоча дене тулыкеш кодшо ӱдырамашлан марий деч посна шуко нелылыкым чытен лекташ логалын. Туге гынат Вероника Николаевна кызытат шочшыжо-влакын ончыкылыкышт верч кӱлын тырша, ешыште йоча-шамычлан ачаштым порын шарналтен, эреак пример семын кугешнен кутыра. Вет пырля илыме годым пӧртыштӧ куанже шукырак лийын. Нелылык годым иктевесылан эҥертен иленыт. Творчествыланат тӱшкан жапым ойыреныт. Вероника гае ава деч шукылан тунемаш лиеш манам гын, нимыняр йоҥылыш ом лий, шонем. Ава ынде, ӱдырем-шамыч кӱшыл образованийым налын, сай специалист лийышт манын, сай шонымаш дене ила.

Вероника Николаевна – йочасадыштат пагалыме воспитатель. Индеш ий жапыште ик мероприятият туддеч посна эртен огыл. Кажне ийын манме гаяк У ий пайрем вашеш тудо, Йӱштӧ кугыза вургемым чиен, ньога-влакым пӧлек дене куандара. Йочасадысе пайремлаште артист семын тӱрлӧ йомакысе геройын рольжым модеш. Шкеак сценарийым воза. Пашаштыже шке возымо тӱрлӧ йомакым, почеламутым, мурым кучылтын, йоча кумылым нӧлта. Шуктен шогымо пашаже нерген тудо тыгерак ешарыш:

Йочасадыште ышташ келша. Тыште педагог-воспитатель семынат, творческий еҥ могырымат шуаралташ йӧн уло. Пашаште эн тӱҥжӧ – йоча-влакым йӧратымаш да нунын деч тидымак шижын шогымаш. Мый ава семын каласынем: воспитатлыме пашаште шукыжо ача-ава деч шога. Икшыве ончылно нуно пример лийшаш улыт. Лач кугу еҥын сай койышыжым, пашажым ончен, ньога кумылаҥын кушкеш. Мыйын шонымаште, икшывым тӱрлӧ направлений дене кушташ оксам чаманыман огыл. Книгам йодеш гын, налын пуыман, семӱзгар але сӱретлаш иктаж арвер кӱлеш гын, окса уке, налын огына керт манман огыл. Икшывын кумылжо вола, да тыршымашыже йомеш.

Кызытсе самырык тукымын сем йогынышто шуктен шогымо пашаж шотышто мурызо тыгайрак акым пуыш:

Самырык тукымлан куанаш веле кодеш. Нуно сай проект-влакым возат. Сомылышт дене марий мландым суапландарат. Кугу таум Марий Эл радиошто тыршыше пашаеҥ-влаклан каласыме шуэш. Тӱрлӧ муро дене калыкым куандарат, шочмо калыклан весела кумылым пӧлеклат.

Корчемкинмыт еш деч умбакыжат у поэзий аршашым, муро-влакым вучаш тӱҥалына да творчествыштышт эшеат кугу кӱкшытыш шуаш тыланена. Анян возымо у мурыжо-влак йоҥгаш тӱҥалыт манын ӱшаным огына йомдаре.

Вероникан книгалан чумырымо сылнымут аршашыже вес ийын лудшо-влакым куандара, шонем.

Зоя ТИМОФЕЕВА