Тений «Марий йылмым эн сайын туныктышо» республикысе конкурсышто Оршанке район Нужавлак школышто марий йылмым да литературым, ИКН-ым, руш йылмым да литературым туныктышо Людмила Михайловна Пирогова икымше верым налын. 18-24 сентябрьыште Карачаево-Черкесийыште эртаралтше «Шочмо йылмым эн сайын туныктышо» конкурсышто Марий кундемнан чапшым арален.
Л.Пирогова Советский район Ваштаршӱ ялеш шочын, У Торъял район Купсола ялыште кушкын. Кугунур школысо 9-ше класс деч вара Оршанке педколледжыш тунемаш пурен. Дипломым налмеке, Оршанке район Нужавлак ялыш марлан лектын. Людмила Михайловна Нужавлак школышто 18 ий туныкта.
«Марий йылмым эн сайын туныктышо» регионысо конкурсышто 1-ше верым налмыжым пашаштыже ик эн кугу сеҥымаш семын палемда. Тидыже тудлан ончыко каяш куатым ешара.
– Мыйын шонымаште, тиде сеҥымашке корно йоча годсо жап гычак тӱҥалын, школ пашаштат, школ деч ӧрдыжсӧ пашаштат эре ончылно лийынам, туныктышо-влаклан полшен шогенам. Оршанке педколледжыш тунемаш пурымеке, шке моштымашнам эше чотрак шуаренна, шукырак пален налынна. Тӱрлӧ методикым тунемынна, школ пашаште тидым вияҥден толынна. Кажне ийын школышто эртаралтше тӱрлӧ конкурсышто коллеге-влаклан полшенам. Тыге мыят конкурсыш ушненам. 2013 ийыште мый конкурсышто шкем тергенам ыле. Ӱшанем, тиде пытартыш сеҥымаш огыл.
Черкесск олаште эртыше Российысе конкурсышто 72 участник коклаште таҥасенам. Тушто марий семӱзгар урокым вӱденам, методический мастер-классым эртаренам. Мый икымше йыжыҥым эртенам, – мане Л.М.Пирогова.
Людмила Михайловналан ончыкыжымат тыгаяк чолга кодаш да пашаште эше у кӱкшытыш шуаш тыланем.