Параньга район Ондропсола ялыште илыше Юлия Петрова Матародо кыдалаш школышто йоча-влаклан физкультурым туныкта, спорт дене заниматла да марла мураш-кушташ йӧрата.
20 ияш самырык туныктышо уло вийжым, шинчымашыжым йоча-влаклан пуаш тырша. Ӱдыр-рвезе-влакым спортлан кумылаҥда.
– 9-ше класс деч вара Оршанкысе педколледжыш тунемаш пурынем ыле. Но тӱрлӧ амаллан кӧра шонымашем кодаш логалын. Тыге Йошкар-Оласе технологический колледжыш банкысе паша специальностьлан тунемаш пуренам.
Спорт дене школ годсек пеҥгыде кылым кучем. Куштылго атлетике дене заниматлем, ече дене коштам, баскетбол дене модам. Колледжыште тунемме годымат спортын нине вид-влакым шуэн омыл. Баскетболын сборный командыштыже модынам. Баскетбол дене кокымшо взрослый разрядемат уло, – ойла Ю.Петрова.
Туныктышо пашалан чонжо эре шупшын
Йоча годсо шонымашыжым шукташ манын, ӱмаште ӱдыр Марий кугыжаныш университетыш физический культур, спорт да туризм факультетыш заочно тунемаш пурен. Тыгодым налме шинчымашыжым вигак практикыште кучылтеш.
– Тунемшем-влак дене тренировкым эртарыме годым шкежат пырля модам, тӱрлӧ упражненийым ыштем, тидын дене икшыве-влаклан примерым ончыктем, – каласыш Юлия Валентиновна.
Марий шӱлышан ӱдыр.
Мартыште эртаралтше «А ну-ка, ӱдыр-влак» конкурсышто Параньга районын чапшым арален. Дефиле годым аваж дене пырля ургымо шочмо кундемжын сӱан вургемым чиен лектын. Усталык конкурсышто марий мурым мурен. Конкурсышто «стиль» лӱмым сулен.
– Марла мураш кушташ изинек йӧратем. Школышто тунемме годым «Ший оҥгыр» ансамбльыш коштынам. Йошкар-Оласе колледжыште шинчымашым налме годым МарГУ-со «Марий мурсем» ансамбльын участницыже лийынам. Кызыт школысо усталык коллективнан ансамбльыштыже мурем. Тылеч посна Ондропсоласе «Поро кас» мурышо да куштышо ансамбльыш жап улмо годым коштам, – манеш устаеҥ.
Теве тудо могай марий ӱдыр – спортсменке: чолга, писе, ушан да мотор.
Калык усталык рӱдерын ВК-се лаштыкше гыч налме фото.