
Ӱдырамаш-шамыч дене таҥастарымаште пӧръеҥ-влакын кочкаш ямдылымаышт моткоч ойыртемалтеш, а ямде сийышт тамышт да шкешотан улмышт дене шукыж годым ӧрыктарат. Лач ик тыгай опытан повар – Максим Глушков.
Кочкаш шолташ йӧратен
Максим – Кужэҥер районысо Тумньымучаш ялын шочшыжо. Рвезе изинек кочкаш шолташ йӧратен, сандене ончыкылык профессийже нерген шуко шонкален огыл. Тудо Йошкар-Оласе торгово-технологический колледжыште повар-кондитер направлений дене калыкым пукшымо шотышто технолог специальностьым налын.
– Ныл ий тунемме жапыште мыланна сай теорий материалым пуэныт, тылеч посна практикыланат тӱткыш ойыралтын. Студент-влак кочкыш дене кылдалтше тӱрлӧ организацийыште шинчымашым пеҥгыдемденна. Мый «Сосновый бор» санаторийын столовыйыштыжо кум тылзе практикым эртенам. Ондак пакчасаска, вара кол да шыл цех дене палыме лийынам, вара веле шокшо цехыште пашам ышташ тӱҥалынам. Повар раскладкым ыштен, а мый тудым шуктышаш улам ыле. Мутлан, тудо иканаште 40 порций «Мимоза» салатым да тулеч молым ышташ кӱштен кертын.
Тунемме тӱшкасе ӱдыр-рвезе-влак икоян лийынна, сандене студент пагытем веселан эртен. Курсовой да диплом пашалан ме шке гыч у рецептым шонен луктынна да вара тудым араленна, – палдара М.Глушков.
Шинчымашым налмыж годымак Максим шке профессийже дене пашам ыштен шуктен. Тудо Йошкар-Олаште ик кафеште шокшо (горячий) цехыште тыршен. Кум тӱрлӧ национальный кухньо: грузин, азиат да итальян – дене палыме лийын. Тиде тудлан шуко у шинчымашым налаш йӧным ыштен, йӧратыме направленийым ойырен налаш полшен. Тыршен пашам ыштымыжлан рвезылан кугурак повар лияш ӱшаненыт. Тыге сомылжат ешаралтын.
Ик кечыште – шӱдӧ кочкыш
Кызыт Максим «Минисыроварня» итальян тратторийыште поварлан тырша.
– Мемнан тыште итальян кухньо, сандене тӱрлӧ пастым, фирменный итальян шӱр ден салатым, пиццым ыштена. Тыштат шокшо цехыште «почаҥам». Паша кече шым шагат гыч тӱҥалеш. 10 шагат марте ме шведский ӱстелым погена. Тудлан тыглай эр кочкыш ямдылалтеш: омлет, пучымыш, сосиске да тулеч моло. Вара ӱстелым кораҥдена да тӱҥ кочкышым ямдылаш тӱҥалына.
Пашаште ме 12 шагат йол ӱмбалне шогена, лач тидым гына тӱҥ нелылыклан шотлем.
Тыглай кече годым 70-100 тӱрлӧ сий ышталтеш, а каныш кече годым – шукырак.
Ме виш кухньышто пашам ыштена, сандене официантын ямде кочкышнам кӧлан наҥгайымыжым, кочшо еҥын могайрак кумылжо лекмым ужына. Кунам уна-влаклан кочкыш келша, официант гоч повар-шамычлан таумутым каласаш кӱштат. Тидыже поснак чоннам ырыкта, – ойла повар.
Самырык повар мӧҥгыштӧ утларак руш калык кочкышым ышташ йӧрата, поснак солянкым, пареҥге немырым шолта.
– Пашаште тӱрлыжат лиеда. Коклан йоҥылышымат ыштет. Мутлан, чекыште пастым ужам да ышташ шогалам, ямдылымеке, официантлан пуэм. А тудо ситыдымаш нерген ойла. Мый ӧрынрак чекым тергем да ужам: тушто ик пасте огыл, а кокыт. Вара писын гына кокымшым ышташ пижам. Тыгай экшык шукыштын лийын колта, но эре огыл.
Шкеже иктаж кафеш кочкаш пурем гын, мыланем сийым кузе ямдылымым эскерем, иктаж-могай экшык лиеш гынат, шотыш ом нал. Мый умылем: тиде паша оҥай, но неле, – мане М.Глушков.