Советский посёлкысо йоча сымыктыш школ тӱжвал сынже денат, кӧргӧ могырымат сымыстара. 2021 ийыште школ «Культура» нацпроектын «Культурная среда» федеральный проектыш ушнен. Тудын почеш школым олмыкташ 58,6 миллион теҥге ойыралтын. Тылеч посна улшо материально-технический базым уэмдаш, тӱрлӧ кӱлеш мебельым налаш Марий Эл Республикын резерв фондшо гыч 2 миллион теҥгем пуымо.
Школын историйже, кызытсе пашаже да моло нерген директор Галина Николаевна Рябчикова каласкален.
Ончыч музыкальный школ, кызыт – сымыктыш
Советский посёлкысо йоча сымыктыш школын историйже 1963 ийыште тӱҥалын. Лачак тудо ийын августышто музыкальный школ уста ӱдыр-рвезе-влаклан шке омсажым почын. Ик ий тудо У Торъял районысо йоча музыкальный школын филиалжылан шотлалтын.
– Ончыч сымыктыш школна тулыкеш кодшо йоча-влаклан школ-интернатын зданийыштыже вераҥын. Тунам тудым Леонид Ильич Николаев вуйлатен. Леонид Ильич йоча-влакым музыклан шӱмаҥден. 10 йоча баян дене шокташ тунемын, 1 йоча – фортепиано дене, – палдара Галина Николаевна.
1968 ийыште музыкальный школым Ломоносов уремыш кусареныт. Да 1976 ийлан ты школышто 9 направлений дене – фортепиано, скрипке, баян, аккордеон, домр, балалайке, флейте, труба, хореографий – тунемыныт. Тунам директор Юрий Михайлович Шишкин лийын. Тудын тыршымыжлан кӧра школ у семӱзгар-влак, ятыр литератур дене пойдаралтын. «Сувенир» калык семӱзгар ансамбль шочын. Тушко утларакшым туныктышо коллектив коштын. Ансамбль районысо веле огыл, республикысе, российысе конкурслаште ятыр гана лауреат лийын. Чувашийыште, Белоруссийыште, Татарстаныште, Удмуртийыште да Башкирийыште концертым ончыктен.
1990 ийыште музыкальный школ сымыктыш статусым налын.
2002 ийыште школым угыч у зданийыш кусареныт. Тунам Людмила Егоровна Лаптева директор лийын. Тудын годым общеэстетический, ранний эстетический вияҥмаш, художественный да хореографий пӧлка-влак почылтыныт. Туныктышо-влак ешаралтыныт.
–Кызыт школыштына 26 туныктышо тырша. 304 йоча тунемеш. Фортепиано, струнно-смычковый семӱзгар, калык семӱзгар, хор, вокал, хореографий, живопись, декоративно-прикладной творчество, ранний эстетический вияҥмаш направленийла пашам ыштат. Солнечный да Алексеевский посёлкыласе, Вятское селасе школлаште классна улыт, – ойла Г.Рябчикова.
Выпускникше-влак дене кугешна
Кызыт школышто йоча хор, «Жемчужинки» да «Солнышко» куштышо ансамбль-влак, скрипкым шоктышто, калык семӱзгар, балалайкым шоктышо да моло ансамбльла улыт. 2018 ийыште Советский посёлкысо йоча сымыктыш школын уста тунемшыже-влак Всемарийский йоча хорышто муреныт. А 2019 ий годсек калык семӱзгар Всемарийский оркестрын участникше улыт.
Школ шке выпускникше-влак дене кугешна. Шукын Российысе тӱрлӧ сымыктыш школышто пашам ыштат. Шке жапыштыже Советский йоча сымыктыш школым Марий Элысе композитор ушемын членже А.Незнакин, Москосо музык академийын профессоржо А.Обухов, Марий Эл тӱвыран сулло пашаеҥже-влак Э.Трифонова ден Е.Моржанаева, И.С.Палантай лӱмеш тӱвыра да сымыктыш колледжын преподавательже Е.Виногорова тунем пытареныт.
Ача-ава-влак полшат
Школ сылне, класс-влак ару да йоҥгыдо улыт. Но, чаманен каласыман, семӱзгар огеш сите.
– Шукерте огыл ик баяным, гитарым налме. Кызыт эше ик балалайкым заказатлыме, але толын шуын огыл. Эркын-эркын тыршена. Кугу тау, ача-ава-влаклан. Нуно мыланна полшен шогат, – ойла директор.
Эн шуко йоча живопись да хореографий направленийлаш тунемаш коштеш. Занятий-влак кечывал деч вара тӱҥалыт. Школышто штатыште ургызо уло. Куштышо коллективын сценысе костюмышт посна классыште аралалтыт.
Галина Николаевна 2016 ий годсек йоча сымыктыш школым вуйлата. Тудо Н.Крупская лӱмеш пединститутым изирак класслам туныктышылан тунем пытарен.
– Йоча сымыктыш школышто директорын воспитатлыме паша шотышто алмаштышылан икмыняр ий ыштенам. Ынде лу ий наре директор улам. Пашаче коллективемлан ӱшанем. Чылан тыршен, чоныштым пуэн пашам ыштат. Мый тыгак актёр мастарлык занятийым эртарем. Йоча-влакым сценыште шкем кучаш, образыш пураш туныктем, – каласыш Галина Николаевна.