Параньга район Олор ялыште илыше Леонтьевмыт еш «Мыйын еш архивем» конкурсышто кокымшо гана ойыртемалтыныт. Тений нуно ты конкурсышто районышто 1-ше верым налыныт, апрель мучаште республикысе кӱкшытыш ушненыт.
Вате-марий Тамара Иосифовна ден Александр Васильевич эрге-шешке, уныка-шамыч дене пырля ик суртышто илат. Чыланат мураш-кушташ тале улыт. Тамара Иосифовна Олор ялысе «Кас ӱжара» ансамбльыш коштеш, Александр пелашыже кушташ мастар. Василий эргыштлан ача-аван усталыкше куснен: тудо гитарым шокта, сылнын мура. Шочшыжо-влакат уста улыт. Саша гитарым перкала, тыгак кызыт гармоньым шокташ тӱҥалын. 5-ше классыште тунемше Харитон клуб пеленысе «Изи шӱдыр» ансамбльыш коштеш, школысо тӱрлӧ мероприятийыште чолгалыкшым ончыкта. Милана йочасадыш коштеш, изаж-влакым ончен кушкеш. Тудо мураш йӧрата.
2014 ийыште нуно «Мыйын еш архивем» конкурсышко икымше гана ушненыт. Тений тыгай конкурсыш Харитон уныкашт дене пырля каеныт, тудо ешыж дене палымым ыштен. Республикыште районын чапшым араленыт.
– Тушко ушнаш школышто темленыт ыле, ме келшышна. Музыкальный еш семын тушко кайышна.
Республик кӱкшытыштӧ ме еш тоштерым ончыктенна. Тиде – ожнысо ыштыр, йыдал, тошто марий тувыр, шовыр, ончылшовыч, шымакш, вынер шовыр, ожнысо рывыж упш, кумалтыш арвер-влак да молат. Вес номинацийыште Харитон уныкана ешна нерген каласкален. Мучашлан Вася эргым гитарым шоктен да ме, Леонтьевмыт тукым, нерген мурым муренна. Шомакым мыланна ик поэтессе келыштараш полшен. Конкурсышто диплом дене палемденыт.
Лу ий эртымеке, тышке уэш ушнаш куан. Йывыртенна, сай кумыл дене чылан мӧҥгӧ толынна. Ийгот ончыко кая, эрге-шешкым вес ганат тыгай конкурсыш ушнат манын ӱшанена, – мане Тамара Иосифовна.
Леонтьевмытын сеҥымашышт шуко. Тидым ятыр дипломышт пеҥгыдемда. Нуно кушто гына шкеныштым терген огытыл да тыгодым шуко гана ончыл верыш лектыныт. Эн кугу сеҥымаш шотеш Тамара Иосифовна Вася эргыжын Анапышке «Золотая игла» фестиваль-конкурсыш миен коштмыжым палемдыш.
Леонтьевмыт чолга, уста, тыгодым поро кумылан улыт, унам вашлийын моштат. Кушкын толшо тукымым ожнысо марий йӱлалан, культурлан, муро-куштымашлан кумылаҥдат. Тидыже таче пеш кӱлешан.