21-22 апрельыште Калык усталык да культурканыш паша шотышто республикысе шанче-методик рӱдер Йошкар-Олаште йоча театр коллектив-влаклан «Театральная юность Марий Эл» фестивальым эртарен.
Ты фестивальлан тӱҥалтышым 1970-80-ше ийлаште пыштыме. Жап эртыме семын тудо тӱрлӧ семын маналтын. 2000-ше ийла гыч фестивальым «Театральная юность Марий Эл» манаш да кок ийлан ик гана эртараш тӱҥалме.
Январь-февральыште фестиваль районлаште лийын. Тушто эн сай спектакльым ойырымо да видеозаписьшым Калык усталык рӱдерышке аклаш колтымо. Вара эксперт комиссий тӱрлӧ кундемла гыч пурышо эн сай спектакльым ойырен да финалышке луктын. Йошкар-Оласе Марий самырык театрын сценыштыже кок кечыште шым спектакль ончыкталтын. Медведево, Оршанке, Советский, Морко районла, Йошкар-Ола, Киров ола гыч йоча театр-влак мастарлыкыштым ончыктеныт, чылаже шым спектакльым аклыме.
Борис Дмитриев, жюри еҥ, театр жанр дене методист:
– Фестивальыш 18 ияш марте ушнен кертыт. Тений кугу унана Киров ола гыч «Зурбаган» калык книга театр ыле.
Спектакль-влакым аклыме годым режиссёрын пашажым, музыкальный оформленийым, сценографийым, тулым, йӱкым, костюмым да молымат шотыш налме. Кажне спектакль деч вара творческий лабораторий пашам ыштен. Тушто виян театральный пашаеҥ-влак сценыште ончыктымо пашам лончыленыт. Вес ганалан пашам саемден колташ манын, режиссёр-влаклан темлымашым пуэныт.
Тыгай фестивальым эртараш кӱлеш. Йоча-влак моткоч мастар улыт.
Гран-прим Оршанке посёлкысо «У Мурочки» образцовый театр-студий налын.
«Драматический театр» номинацийыште 1-ше верыш Медведевысе «Волшебник» театр школ-студий лектын.
«Образцовый театр коллектив-влак» номинацийыште 1-ше верым Йошкар-Оласе «Воштончыш» образцовый музыкально-драматический, 2-шо верым Киров оласе «Зурбаган» книга-влак калык, 3-шо верым Оршанкысе самырык-влаклан «Спутник» ден Моркысо образцовый театр-влак налыныт.