Курыкмарий районысо Усолаште Святой Шӱлыш лӱмеш черке пеленысе рушарня школ 2021 ийыште шке лӱмгечыжым палемда. 10 ий ончыч Александр ача Малиновын благословитлымыже почеш черке пелен рушарня школ шке омсажым почын.
«Икымше занятийлашке индеш ияш гыч тӱҥалын латкуд ий марте нылле утла ӱдыр-рвезе толын, – шарналта рушарнясе школ директор Ирина Ипполитовна Мельникова. Чылаже кум тӱшка погынен: изирак, кыдалаш да кугурак ийготан йоча-влак.
Нунылан тушто мом туныктат, палашышт оҥай ыле. Кӧ тыгай Юмо, черкыш молан коштман, кузе тушто шкем кучыман? Йоча-влакланат, кугурак еҥ-влакланат чыла у лийын. Ондак рушарнясе школын ниможат лийын огыл, эсогыл – зданийжат. Юмылан тау, занятий-влакым эртараш Усола кыдалаш школышто ик кабинетым пуэныт. Повар-влак чайым йӱктеныт. Юмын Закон деч посна йоча-влак церковнославянский йылме, черкысе мурымаш шотышто шинчымашым налыныт. Рвезе-влак чаҥым кыраш тунемыныт. тидлан нуным Александр Николаевич Сиситкин туныктен. Кызыт тудо иерей саным налын да Йоласал ялыште Христос Шочмо лӱмеш храмыште служитла.
Илен-толын, лу ий жапыште Юмо мыланна зданийымат пуэн. Тачылан рушарня школыш кумло наре йоча коштеш. Юмын Закон нерген шинчымашым налме деч посна шуматкече еда нуно Юмын Авалан акафистым мурат. Христосын Шочмо лӱмеш, Кугечылан концерт-влакым ямдылат да прихожан-влаклан ончыктат.
Нине пайрем-влакым йоча-влак пеш йӧратат, уло кумылын ямдылалтыт. Толшо уна-влаклан шке кидышт дене изи пӧлекым ыштат, мурым мурат, почеламутым каласкалат. Кертме семын тӱрлӧ православный конкурсышто участвоватлат, сеҥыше радамыш лектыт.
Иерей Александр Малинов, храмын настоятельже да рушарня школын духовникше, йоча-влак верч чот тургыжлана. Нунылан эре пӧлекым ышта, святой верлаш наҥгаяш тырша. Йоча-влак Дивеевысе да Макарьевысе ӱдырамаш монастырьлашке, Чувашийысе да Курыкмарий районысо святой верлашке миен коштыныт.
Лу ийыште кум выпуск лектын: латвич ӱдыр-рвезе. Нуно кызытат шке рушарнясе школыштым монден огытыл, порын шарнат.
Йошкар-Оласе да Марий Элысе митрополит Иоаннын благословитлымыж почеш
Надежда ФЕДОСЕЕВА ямдылен.