Тышке Эҥерсола гыч шым меҥге нарым шотлат. Ме ончыч Усола Вончӱмбалын уремже дене эртышна. Корно тышке пешыжак куандарыше огыл. Тале йӱр йӱрын эрта гын, пуренжат от керт. Ятыр таве шинчамлан перныш. Тугеже вӱдым ожнысо семын нумалыт манын шоналтышым. Сӱмырлышӧ савар, волен кайыше оралте, «тулык» сурт-пече-влакым ончен, чонлан шӱлыкынат чучын колтыш. Тыгай сӱрет кажне йолтошкалтышыште, манаш лиеш. Ондак тыште чапле клуб, книгагудо, кевыт, медпункт, апшаткудо лийыныт.
Кугу Ачамланде сарыш Усола гыч 48, а Памашсола гыч 33 пӧръеҥ каен. XIX курым тӱҥалтыште Морко – Шолэҥер кугорно Усола гоч эртен. Ял покшелне икмыняр лопка пушеҥге тӱҥ шога. Ожнысо калык, ялым кугу вӱд деч аралаш манын, тудым шынден. Усолаште куд сурт веле кодын, тореш уремыште кок пӧрт ты ялынлан шотлалтыт. Ялыште изак-шоляк Ягодаровмыт илат. Нунын авашт Анастасия Яковлевна Ягодарова – «Мать-героине», куд эргым да ныл ӱдырым ыштен. Кудымшо эрге – Геннадий Геннадьевич Ягодаров – сулен налме канышыште. Пелашыже Людмила Демьяновна «Звениговский» озанлыкын Эҥерсолаште верланыше комплексыштыже тырша. Тудо кажне кечын манме гаяк пашаште гын, суртоза мӧҥгысӧ сомылым тӧрла.
– Ялыште паша эреак лектын шога, – мутланымашке ушныш Геннадий Геннадьевич. – Кызыт пакчаште, пӧрт ончылно куштырам эрыктена. Ме вольыкым ятыр ашнена: ушкалым, сӧснам, презым, тӱрлӧ кайыквусым. Шӧрым, шылым, пакчасаскам чыла шкенаным кочкына. Ялыште утларакшым пенсионер-шамыч веле кодынна. Мемнан ялыш автобус ик ганат коштын огыл. Иктаж-кушко кайынена гын, Эҥерсолаш йолын лектына. Кызыт шке машина дене кудалыштына. Арнялан кум гана автолавке кевыт толеш. Кок гана тӱрлӧ кочкыш-сатум кондат гын, ик гана – киндым. Икманаш, оксат веле лийже.
Пӧртым пу дене олтен ырыктена. Мемнан деке, очыни, газ нигунам толын огеш шу. Садлан тидын нерген шонымашат уке. Пошкудо суртышто изам ила. Ме вет ешыште лу йоча лийынна. Ялыште тыгак эн изи шӱжарна Вероника пӧртым куча. Тудо каныш кечылаште толын коштеш.