Ушым кандара, парням лывырта

Ондак кидпашам ужалаш пазарыш кошташ кӱлын. Кызытсе тидым Интернет дене ышташ лиеш. Ик кечын инстаграм сайтыште мыят тӱрлӧ фото-влакым ончен шинчышым. Шинчамлан мотор брошь-влак пернышт. Ты айдемын лаштыкышкыже пурымеке, марий сӧрастарыме ӱзгар-влакым ужым. Палыме лийде шым керт.

Ирина Митрофанова – Провой кундем Эсмекпляк селан шочшыжо. Школым тунем пытарымеке, Марий пединститутышто тӱҥалтыш класслаште туныктышо специальностьым налын. Тунамак парикмахерлан тунемын.

Звенигово оласе школышто кум ий пашам ыштымеке деч вара парикмахерлан пашаш пуренам. Ынде тыште лу ий ыштем, – ойлыш Ирина.

Ӱдыр кидпашалан изиж годсек шӱмаҥше лийын. Крючок але спице дене пидын, шӱртӧ, алмаз мозаике, шер дене тӱрлен. Скрапбукинг, канзаши денат ик жап заниматлен.

Канзаши дене бантик-влакым ямдылыме годым брошь-влакым ышташ кумыл лектын. Варарак Интернетыште шер дене ыштыме вӱдшырчык (стрекоза) брошьым ужынам. Пеш келшен, но ыштен омыл. Икымше пашам клевер лышташ лийын. Жап эртыме семын, вӱдшырчык брошьымат ышташ тӱҥалынам. Ӱмаште кеҥежым брошь-влакым шуко ыштылынам, – каласыш кидмастар.

Ирина пашаже-влакым ондак палыме але йолташыже-влаклан пӧлеклен. Соцсетльлаш фото-влакым изин-изин вераҥдылын. Но ужалаш аптыранен. Тидлан йолташ ӱдыржӧ полшен. Тудо палыме-влаклан брошьым ужалкален, заказым тудын гоч ыштеныт.

Брошьым Китай гыч кондымо шер-влак дене ондак ыштылынам. Нуно тӱрлӧ кугытан улыт, сандене тӱрлӧ семын сӧрастаренам. Идалык наре тыге ыштымеке, шергырак акан шерым наледаш тӱҥалынам. Мутлан,Чехий да Японий гыч кондымым. Сваровский стразе-влакым налам. Икманаш, сай материал дене пашам ышташ тыршем.

Йӧратыме пашамлан кастене жапым ойырем, шукыж годым йӱдым ыштен шинчем. Моло жапым пашалан, ешлан, пӧрт сомылкалан кая. Южгунам ик тӱрлӧ брошьымак икмыняр гана ышташ йодыт. Иктымак ятыр гана ыштенам гынат, кажныжым кумылын ямдылем. Пытартыш жапыште марий сынан брошь-влакым шукырак йодыт, – манеш И.Митрофанова.

Ик брошьым ышташ мыняр жап кая?

Изирак кидпашалан 2-3 кече кая, кугуракшым арня ямдылем. Суткаште кум-ныл шагат ыштен шинчем. Заказ ятыр уло, южгунам йодшо-влакым вучыкташат логалеш. Паша сай лектышан лийже манын, тыршаш кӱлеш. Шагал огыл рончашат логалын. Мый мастер омыл. Тидлан шуко палыман да тунемман. Ушым кандарыме, йӧратыме пашам ыштем.

Ирина кумылан вес еҥ-влакымат туныкта. Тений Звенигово районысо тоштерыште кок гана мастер-классым эртарен. Ик гана мороженый ден пирожныйым, а вес гана ныл лышташан клеверым ыштеныт. Шошым верысе библиотекыште эртарыме «БиблиоЛеди-2019» конкурсышто сеҥышылан спонсор семын брошьым кучыктен.

Ирина Митрофанова «Туристический сувенир» районысо конкурсышто шке мастарлыкшым терген. Тудын кид дене ыштыме «Кече» брошьшо «Сувенир Республики» номинацийыште 1-ше верым налын.

Тиде пашам умбакыжат шуяш шонет? Ала иктаж бизнес-планет уло?

Шонымаш моткоч шуко, жап гына огеш сите. Шукертсек авторский брошьым ыштынем, но але кидем шуын огыл. Илен-толын, садак кушкын шуам, ыштем, вием веле ситыже, – шыргыжал каласыш кидмастар.

Еш альбом гыч налме фото-влак.