«Ушкалым лӱшташ ече дене куржталме гай огыл»

Тыге манеш профессионал спортсмен Яролав Егошин.

Тудын ойлымыж почеш, спорт моткоч шуко вийым да ӱнарым налеш. Кызыт шуктымо сомылжо тудлан моткоч куштылгын пуалтеш. Ярослав – У Торъял районышто чапланыше «Первый Май» озанлыкыште ушкалым лӱшта. Кызытсе илышыште ты профессийым аппарат дене лӱштышо оператор маныт. Самырык спортсмен молан лач ты профессийым ойырен? Чыла тидым умылкалаш манын, Ярослав дене мутланышна.

Спорт

Ярослав Егошин – У Торъял районысо Немда ялын шочшыжо. Изинек спортым йӧрата. Футбол, баскетбол, ече дене заниматлен. Кушмо семын ечылан утларак шӱмаҥын да спортын ты видше дене шкенжым профессионально шуараш тӱҥалын. Тидлан тудым физкультурым туныктышо Лев Васильевич Пирогов кумылаҥден. Школ деч вара Семёновка селасе Олимпийский резерв училищышке тунемаш пурен. Тыште рвезе тренировкылан жапым утларак ойырен, тӱрлӧ таҥасымаште вийжым терген, Российын спорт мастерже марте кушкын. Училищыште тунеммыж годым тренер Николай Анатольевич Кошкин дене шуаралтын. Ик жап ече дене Российысе юниор-влакын сборныйжын еҥже лийын. Элын чапшым Финляндийысе Лахти олаште аралыме годым, эстафетыште кокымшо лийыныт. Шкет таҥасымаштат сай результатым ик гана веле огыл ончыктен. Юл кундемысе федеральный округын первенствыштыже (Татарстан кундем, Заинск ола) сеҥен. Тыгак Росстйын первенствыштыже (Сыктывкар олаште) икымше верым сулен.

Спортсмен улат гын, ятыр жапым тренировкылан, сбор-влаклан ойырыман. Ярославын яра жапше лийынат огыл манаш лиеш. Кажне гана – сбор, тӱрлӧ ола ден эл-влак. Рвезе Эстонийыште, Болгарийыште, Австрийыште, Швейцарийыште, Финляндийыште лийын. Шоналташ гын, иктаж элыштыже илашат кодын кертеш ыле докан. Но тудо шочмо-кушмо верышкыже пӧртылын, эсогыл фермышке пашаш пурен.

Фермыште

Самырык рвезе ынде кокымшо ий ушкалым лӱшта.

— Мӧҥгӧ пӧртылмеке, «Первый Май» озанлыкыш пашаш вигак пуренам. Шукынжо тидлан ӧрыныт ыле, южышт гын, мӧҥгешла, мокталтеныт. Мый изинекак спортлан ятыр жапым ойыренам, шочмо-кундем деч тораште шуко жапым эртаренам. Садлан спортым коден, мӧҥгӧ толаш кумылаҥынам, – мутланымашым тӱҥале Ярослав.

– Тый вет тренерын сомылжым але иктаж вес пашам ойырен налын кертат ыле. Молан лач фермыш да ушкалым лӱштышылан пашаш пуренат? – йодым тудын деч.

— Мыланем ты сомыл моткоч куштылыгын пуалтеш. Адакшым мӧҥгӧ гыч комплекс марте машина кондыштара. Мый Чӱксола деч 12 меҥге тораште илем. Ече дене коштмо годым утларак нойыла чучеш ыле.

— Паша кечет кузерак эрта? Ялысе илышын тамжым тугеже шижын шуктенат?

— Ме смене дене, кечым коден, пашам ыштена. Ушкалым лӱшташ кум шагат эрденак кынелына. Тӱҥ сомылнам пытарымеке, паша куштылемеш. Ушкал-влакым уремыш луктына.

Ялысе илыш мыланем моткоч келша, ала-могай кугу нелык дене але тӱкнаш логалын огыл. Тӱҥжӧ – аракам ит йӱ, паша вер лийже. Самырык, виян, пашаче кид кызыт ялыштат, олаштат кӱлеш. Озанлыкыште пашадарым сайын тӱлат, икмыняр ий дене тыршет гын, тӱрлӧ премий дене палемдат. Тыгак ешым чумыраш, пӧртым чоҥаш льгото-влак дене пайдаланаш лиеш. Мыйын шонымаште, ялысе еҥлан тиде – пеш сай шӱкалтыш. Пашам ышташ веле ит ӧркане.

Ончычшо вольык сомылым кузе тӧрлыман манын паленат отыл, очыни. Ешыштет ушкалым лӱштышо-влак лийыныт мо?

— Кочам ден ковам фермыште тыршеныт, но мый тунам изи лийынам. Тылеч ончыч фермыштыжат ик ганат лийын омыл. Мӧҥгыштӧ вольыкым ашненыт, но ты сомыллан мыйым шӱдыркален огытыл. Садлан, пашаш толмекем, мыланем чылажат у ыле, тунемаш кӱлын. Шагал огыл пӱжалташат пернен. Кызыт гын тунем шуынам манаш лиеш. Эрден эрак кынелаш нелыракын чучеш, а тыгеже йӧндымылыкым шижын омыл.

Ярослав кызыт – шке верыштыже. Паша тудлан келша, ял гыч каяш шонымаш уке мане. Ончыкылык нерген ойлаш гын, илыш турло жапыште вашталтын кертеш. Но самырык, пашам йӧратыше еҥ-влаклан, мыйын шонымаште, корным чыла вере почмо.