Медведево районышто автоинспектор-шамыч вело- да мототранспорт—влакым ужалыме верлаште тудым чын виктарыме шотышто правилым ушештареныт.
Игече саемме дене уремлаште кок ораван технике дене пайдаланыше йоча да подростко-влак шукырак вашлиялтыт. Ты категорийыш велосипедист-шамыч веле огыл, тыгак питбайкым, скутерым, мопедым виктарыше-шамычат пурат. Шукыж годым ача-ава-шамыч икшывыштлан тыгай транспортым налмышт деч ончыч, кушко тудо шуктен кертеш огытат шоналте. Мототехникым виктараш водительын удостоворенийже кӱлмымат шотыш огыт нал.
Ты амал дене мототехникым виктараш документ кӱлмӧ нерген ушештареныт. Тылеч посна техникым виктараш автошколышто лӱмын шинчымашым пойдараш кӱлмӧ нерген ойленыт. Уке гын, закон ончылно мутым кучаш шогалтен кертме нерген палдареныт. А шинчымашым налме деч посна техникым виктарымаш тазалыклан кугу эҥгекым ыштен кертеш.
Садлан ужалыме верлаште пашам ыштыше да техникым налаш шонышо-шамычлан автоиспектор-влак могай ответственность улмо нерген радамленыт. Велосипедист-влаклан кугорно дене 14 ийым темымеке гына кудалыштме нерген палдареныт.
Изирак ийготан велосипедист-шамычлан йолын кошташ келыштарыме верлаште да тротуарлаште веле транспортым виктараш лиеш. Тыгодым велошлем, кынервуйым да пулвуйым аралыме арвер дене пайдаланыман. Тыге йоча камвочмыж годым капкылжым ок эмгате.
Тыгак питбайк, квадроцикл дене кудалыштме годым правилым пудыртымылан, административный ответственность уло.
Транспортым налаш шонышо-шамычлан кок ораван транспортым виктарыме годым могай лӱдыкшӧ улмо шотышто листовкым пуэденыт.