11 майыште М.Шкетан лӱмеш Марий драмтеатрыште «Идалыкын туныктышыжо» (17 еҥ ушнен), «Идалыкын воспитательже» (16 еҥ), «Марий йылмым эн сайын туныктышо» (5 еҥ), «Шӱмем йоча-влаклан пуэм» (19 еҥ) Российысе конкурс-влакын регионысо йыжыҥыштыже сеҥыше-влакым палемдыме.
Конкурс годым участник-влак мастер-классым ончыктеныт, урокым, класс шагатым эртареныт, туныктымо проект дене палымым ыштеныт. 11 майыште «йыргешке ӱстел» йыр погыненыт.
Тений тыгай конкурслашке кундемна гыч 57 туныктышо ушнен.
Сеҥышыш лекше-влаклан Марий Элым Вуйлатыше Юрий Зайцев сулло наградым кучыктен. Тений тудын кӱштымыж почеш туныктышо-влаклан Марий Эл Республикым Вуйлатышын окса премийжым (грантшым) пуымо.
«Идалыкын туныкышыжо» ден «Марий йылмым эн сайын туныктышо» конкурслаште сеҥышыш лекше-влаклан 100 тӱжем теҥге гыч пуымо гын, «Идалыкын воспитательже» да «Шӱмем йоча-влаклан пуэм» конкурслаште ончыл верым налше-шамычлан – 75 тӱжем теҥге гыч.
Регионысо йыжыҥыште сеҥышыш лекше-влак Марий Элын чапшым Российысе конкурслаште аралат.
«Шӱмем йоча-влаклан пуэм» конкурсышто ончыл вер дене Йошкар-Оласе йоча да самырык-влакын технический усталык рӱдерыштын педагогшо Николай Валерьевич Шаропин палемдалтын.
«Идалыкын воспитательже» конкурсышто Волжск оласе йочасадыште пашам ыштыше Анастасия Павловна Шакурова ончыл верым налын.
«Марий йылмым эн сайын туныктышо» конкурсышто Оршанке районысо Лужбеляк школышто марий йылмым, литературым, руш йылмым да литературым, ИКН-ым туныктышо Людмила Михайловна Пирогова сеҥен.
«Идалыкын туныктышыжо» конкурсышто Юрино районысо Марьино школышто биологий ден химийым туныктышо Валентина Владимировна Дружинина ойыртемалтын.