Кеҥеж. Ик каныш кечын эргым дене Йошкар-Олаш банкыш кудалына. Толын шумеке, эргым вес банкыш наҥгайынеже ыле, но мый шонен пыштыме верышкемак кайышым. Зданийыш пурен шогалмеке колам: пырысиге йӱк шокта. Ончальым гын, лукышто але шинчам почдымо изи чонан наста кия. Кӱлдымӧ модыш семын луктын кудалтеныт улмаш. Оксам налде, пырысигым оҥ пелен ӧндал кучен, эргым деке лектым. Эргым ӧрын, мо лиймым огеш умыло. Адакшым изиш шыдешкышат. «Мӧҥгыштӧ ныл пырыс уло. Тылат шагал мо?» – йодо.
Кызыт тиде пырысиге кушкын шуын. Кодшо кеҥежым банке-влакым духовкыш стерилизоватлаш шынденам. А шкеже тидын нерген монденам. Малаш возынам. Жап изиш гына эртыш, саде пырыс толын да йӱкым пуа, шинчашкем тура онча. Лыпланыже манын, кутыраш тыршем, а тудо утыр магыра. Вара кухньыш кудал кайыш. Ончем, плита ваштареш пурен шинчын да уло кертмын васара. Тунам гына банке-влак нерген шарналтышым. Очыни, пырыс тыге мыланем таушта.
А.ИВАНОВА. Медведево район.