«Ятыр вашлиймаш пӱрымашем деке конден», – манеш Курчак театрын актрисыже Анжела Тихонова. Тудо 2011 ий гыч театрыште тырша, ятыр рольым модын. Тыгак шкенжым режиссёр-постановщик семынат палдарен шуктен.
Тыланет илаш…
А.Тихонова Шернур район Эшполдино ялеш шочын-кушкын. Марисола кыдалаш школышто шинчымашым поген. Анжелан аваж ден кочаже туныктышо лийыныт, сандене ӱдыр нунын корнышт дене каяш шонен.
– Республикыштына кумдан палыме писатель, краевед, педагог Дина Михайловна Рычкова мыйын пӱрымашышкем надырым пыштен. Тудо школышто марий йылмым да литературым туныктен. Йыван Кырлан лӱмгечыжлан спектакльым шынден да мыламат рольым модаш пуэн. Тиддеч вара актрисе лияш кумылаҥынам. Сандене Палантай лӱмеш тӱвыра да сымыктыш колледжыш тунемаш пураш манын, шке гыч кушташ да мураш ямдылалтынам.
Кокытеланымаш лектын, сандене МарГУ-шко культуролог специальностьым налаш документым пуэнам.
Кок вережат тунемаш пураш баллем ситен. Мом ойырен налаш, пален омыл. Авам ойлен: «Тыланет илаш, корнетым шке ойырен налшаш улат». Тыге колледжыште «Курчак театрын актёржо» специальность дене шинчымашым погаш тӱҥалынам, – шарналта актриссе.
Нылымше курсышто тунеммыж годым А.Тихонова ешым чумырен. Ваня икымше эргыже шочын.
– Тунеммем годым чын корным ойырен налынам але йоҥылыш ыштенам манын, шуко шоненам. Но эргым шочмеке, шинчаончалтышем вашталтын, Курчак театр лишыл чучын, ты аланыште тыршаш кумыл лектын. Авам ден пелашем мыйым умыленыт, эре полшаш тыршеныт. Сандене эргым 2 ийым темен шуктен огыл гынат, пашаш лектынам. Мый кеч-могай рольым модаш ямде улам ыле. Курчак театрыште чыла роль кӱлешан, шонем, – палдара А.Тихонова.
Самырык актёрлан, театрыш толмеке, ондак «пуртымо» рольым модаш пуат.
– Мый «Брат мой Каплик» спекталькыште Дроздиха-авам модынам. Вара –«Щелкунчик» спектакльыште Клара лӱман ӱдырым. Ты спектакльыште колледж гыч Н.И.Голованова туныктышем дене пырля модынна. Тудо гына мыланем образым чын чоҥымо нерген каласен кертын, полышкален, ой-каҥашым пуэн. Вет кеч-могай пашаште партнёр деч шуко шога. Кажне актёр сай лектышыш шуаш шона гын, весым умылен да колыштын моштышаш.
Мыланем «Снежная Королева» спектальыште Гердам модаш эн чот келшен. Тудо чонемлан, койышемлан келшен толын, Герда поро кумылан, весе-шамычлан эре полшаш ямде, – ойла Анжела.
Курчак театрын сценыштыже А.Тихоновам «Колобок», «Золушка», «Бука», «Айболит», «Три поросёнка» да моло спектакльыште ужаш лиеш.
Режиссёр корно
Шуко еҥлан Анжела Тихонова режиссёр-постановщик семынат палыме.
– Паша коклаште Палантай лӱмеш тӱвыра да сымыктыш колледжыште туныктышо Юлия Юрьевна Цыкинам вашлийынам, тудо О.Г.Иркабаевын «Любительский театрын режиссёржо» курсыш тунемаш пураш темлен. Ты курсыш логалаш творческий заданийым, прозо ден почеламутым сылнын каласкалаш да экспликацийым (произведенийым лончылымаш) возаш кӱлын, – манеш актрисе.
Ты курс МарГУ-што Калыкле тӱвыра да тӱвыра кокласе коммуникаций институтышто эртен. Анжела 5 ий заочно тунемын.
– Тунеммаш моткоч весела да пайдале лийын. Шуко жап шке семын пашам ышташ пуалтын. Сессий студент-влаклан шуаралташ, шонымашым илышыш шыҥдараш, налме шинчымашым практикыште кучылташ йӧным пуа. Кажне сессий годым ме произведений гыч кӱчык ужашым ончыктенна. Диплом пашана годым, реквизит ден костюмым кучылтын, кугу спектакльым ончыктышаш улына ыле. Мый Уильямс Теннессин «Предназначено на слом» пьесыжым ойырен налынам. Тудо кызытсе илышлаш келшен толшо. Тушто самырык тукым, ача-ава кокласе кыллан кугу тӱткыш ойыралтеш.
Тыгак Палантай лӱмеш тӱвыра да сымыктыш колледжыште театральный лабораторий пашам ыштен. Тушто студент-влак шке пашаштым ончыктен кертыныт. Лӱмлӧ театровед нуным аклен.
Тиддеч вара критике деч лӱдаш огеш кӱл, тудо пашаштына кӱлеш манын шкалам палемденам. Тӱҥжӧ: критикым чын умылен мошташ да ончыкыжым тыгай йоҥылышым ышташ огыл манын тыршаш, – мане А.Тихонова.
Йоча-шамычым шуара
О.Г.Иркабаевын курсшым тунем лекмеке, Анжела «Виктория» йоча музыкальный театрыште пашам ышташ тӱҥалын.
– Ик ий туныктышо-шамычым алмаштенам. Вара «Мастерство актёра» предметым вӱдаш тӱҥалынам. Ынде куд ий тыште тыршем. Ты театрыш 3 ияш гыч йоча-шамычым налыт. Мый 6-16 ияш икшыве-влак дене пашам ыштем. Тунемше-шамычлан тыршаш, шуко книгам лудаш темлем. Тудын шинчымашыже шинча гоч палдырна. Актёр ушан, шуко палыше лийшаш, тунам гына тудо ончышо-влакым иктаж-молан туныктен кертеш ойлем.
«Виктория» йоча музыкальный театр ятыр грантым сеҥен налын. Лектышна сай, сандене йоча-шамычын тыршымыштым ончыкташ манын, Курчак театр гыч художественный вуйлатыше-влакым шкенан деке ӱжынам. Галина Ковалёва мыланем ӱшанен да Курчак театрыште модыш программым эртараш темлен. Ты программе чылалан келшен, ме тудым тӱрлӧ йочасадыште ончыктенна, ВДНХ-ат миенна, – палдара А.Тихонова.
Кеч-могай пашаште нимо яра огеш тол, шке гыч шуко тыршыман. А.Тихоноват тидым умылен, «Кто сказал Мяу?» Бэби-спектальым шонен луктын. Екатерина Андрейчук художник-постановщик эскизым ышташ полшен. Спектакль 1-3 ияш йоча-шамычлан пӧлеклалтын, тыглай йылме дене ончыктымо лийын. Сандене шукылан келшен, палыме лийын. Кызытат ты спектакльлан билетым кӱчык жапыште налын пытарат.
– Ты спекталь дене ме Владимир олаш «МалышОК» Бэби-курчак театр-влакын тӱнямбал фестивальышкышт миен коштынна. Тушто Валерий Ильич Баджи Москосо курчак театрын режиссёржо дене палыме лийынам. Тудо режиссёр-влаклан квалификацийым нӧлтымӧ курсым эртарен, мыят йодмашым колтенам. Кызыт ынде Ярославльысе театральный институтышто «Курчак театрын режиссёр» курсышто тунемам. Тиде институт виян кокла гыч иктыже, тыште программым кӱчыкемдыме, уто предмет-влак уке улыт, чыла профессий дене гына кылдалтын.
Ик ий тунеман да тудлан оксам тӱлыман. Курчак театр тидын шотышто мыланем полша, тудо тунеммылан тӱла, сессийыш колта. Мый нунылан тауштем, – ойла актрисе.
А.Тихонова 3 ияш гыч тӱҥалын йоча-шамычлан «Умная собачка Соня», 10 тылзаш гыч икшыве-влаклан «Снег» да «Гадкий утёнок» спектакль-влакым ямдыла. Могай тылзыште ончыкташ тӱҥалмым Курчак театрын сайтыштыже палдарат.
Дарья Быкова.
И.Речкинын фотожо.
«Виктория» йоча музыкальный театр Россий Президентын грантшым сеҥен налын. Театрын пашаеҥже-влак «Терапия театральным искусством семей с детьми с ОВЗ через работу над постановкой спектакля-притчи «Говори со мной» по мотивам романа И.С. Тургенева «Отцы и Дети» проектым илышыш шыҥдараш тӱҥалыт. Пашалан августышто пижыт. Тушто начар тазалыкан йоча ден ача-ава-шамыч тыршаш тӱҥалыт, тыгак театрын тунемшыже-влакат ушнат. Спектакльым Курчак театрыште ончыктат.
А.Тихонова «Йӱксалче» («Песнь небесной птицы») шкешотан, ойыртемалтше, у спектакльым шынден. Тудын премьерыже 2023 ий октябрьыште калык ончыко лектын. Тиде спектакль – самырык режиссёрын кокымшо пашаже. Тыште Вӱд-Ава, Мланда-Ава да айдемын шочмыжо, еҥын вийдымылыкше да экшык, пӱртӱс дене кыл нерген каласкалалтеш. Кеч «Йӱксалче» эксперимент шотан лийын, тудо ятырномнацийыште палемдалтын.