4 майыште Йошкар-Оласе строительный техникумышто «Мо? Кушто? Кунам?» уш-акылым пудыратыше модмаш эртаралтын. Тушко «Памяти предков великих будем достойны!» проектын участникше-влак погыненыт.
Модмашке колледж ден техникум гыч 13 команде ушнен. Нунылан Кугу Отечественный сар дене кылдалтше тӱрлӧ йодышым пуэденыт. Тӱҥ шотышто сарыште ойыртемалтше полководец, тале кредалмаш да историйыште палемдалтше тӱрлӧ фактым палаш кӱлын. Модмаш участник-влаклан тыгак шуко оҥай историй да факт-влак дене палдараш йӧным ыштен. Нуно Кугу Отечественный сар нерген шуко кӱлешан информацийым пален налыныт. Сеҥышыш Кугыжаныш да муниципал службо колледжын командыже лектын, кокымшо Столичный бизнес колледж, кумшо – Марий Элысе политехнический техникум.