18 майыште Тоштер-влакын тӱнямбал кечышт. Лудшына-влак тоштерыш коштыт мо?
Надежда Годунова, Йошкар-Ола:
– Тоштер-влак калыкнан поян тӱвыражым аралат. Тудын ончычсо да кызытсе илышыжым умылаш, таҥастараш полшат. Йочасадыште икшыве-шамычлан «Марий Элыште илем» рубрикым вӱдымем годым нунын дене Йошкар-Оласе чыла гаяк тоштерыш миен толаш шоненам ыле. Изи ньога-шамыч дене олаш лекташ пешыже йӧнан огыл, сандене нунылан Евсеев лӱмеш тоштер гыч экскурсийым виртуально эртаренам. Тылеч вара оласе эше куд тоштерыште лийынам. Тидланже Йошкар-Оласе 80-ше номеран «Ӱжара» йочасадыште эртаралтше конкурсышто участвоватленам. Тушто-влакым паленам да экскурсийыш тарваненам. Палемдыме почеш эн ончыч республикысе изосымыктыш тоштерыш, вара Ший пӱян Пампалче марий йомак тоштерыш, Национальный художественный галерейыш, Сыр тоштерыш, Йошкар-Олан историйже тоштерыш, Евсеев лӱмеш тоштерыш миенам. Варажым тушто лиймем нерген йоча-влаклан каласкаленам.
Кажне тоштер ойыртемалтше, тушто шуко ум пален налаш, уш-акылым пойдараш лиеш. Садлан тыгай верлашке коштманак. Мый шкеже тоштерлаш кошташ моткоч кумылан улам. Ончыкыжым угу олаласе тоштерлашкат миен толаш шонем. Тыге айдемын илышыже сылнештеш, тӱняумылымашыже пойдаралтеш.