Урвоч эмла

200 мл шокшо вӱдыш 20 г урвочым пыштыза, ик шагат шинчыктыза да шӱрыза. Лемым ик-кок кугу совла дене кечеш кум-ныл гана шондыгалташте кӱ улмо, шӱм черлан кӧра пуалме, шекшкалта, мокш пуалме, ӱдырамаш чер, атеросклероз, гипертоний чер годым йӱман. Ты лем дене кужун парем кертдыме, шӱйшӧ сусырым, йорам, могыр коваште пуаҥмым (пролежни) ӱшташ, подагре, ревматизм, плеврит годым корштышо йыжыҥыш, кокшаш компрессым ышташ лиеш. Ангине годым логарым шӱалташ сай.

200 мл шокшо вӱдыш 25 г урвочым пыштыза да изи тул ӱмбалне пел шагат шолтыза, шӱрыза. Вӱд пучен гын, шолшо вӱдым ешарыза. Лемым ик кугу совла дене кечеш кум-ныл гана кочмо деч вара шондым лукшо йӧн семын верге да шӱм, шондыгалта чер годым йӱман. Тыгак умшагӧргым, логарым шӱалташ, сусырым, йорам, могыр коваште пуаҥмым (пролежни) мушкаш, корштышо йыжыҥыш компрессым ышташ лиеш.

Свежа урвочым мушса, тыгыдемдыза да сокшым пунчал налза. Тудым холодильникыште аралыза. Сокым кок изи совла дене кечеш кум-ныл гана шондым лукшо йӧн семын пуалме (отёк) годым йӱаш сай. Тыгак вӱр йогыман, шӱйшӧ сусырым, йорам эрыкташ лиеш. Нер гыч чӱчкыдын вӱр йогымо годым неррожыш кок-кум чӱчалтыш дене чӱчыкташ сай.