Кидпашам ыштет – чонет кана, кумыл нӧлталтеш. Таче кундемыштына шуко кидмастарым вашлияш лиеш. Нунын кидпашаштым ончен, кидлан мастар улмыштым умылет. Икте пидеш, весе тӱрла, кумшо урга. Южышт тидлан уло жапыштым пӧлеклат, молышт яра жап годым гына пашалан пижыт. Советский район Роҥго селаште шочын-кушшо, У Торъял район Кугу Лумарий ялыш марлан толшо самырык кидмастар Ольга Соломина ынде кумшо ий марий тувырым урга.
Соломинмыт ондак Йошкар-Олаште иленыт. Ольга профессийже дене – медсестра. Йошкар-Олаште верланыше Марий Эл Республикысе йоча эмлымверыште, варажым вӱрым пуышо республикысе станцийыште ыштен. Декретыш лекмекыже, пелашыж дене ялыш кусненыт. Лач ты пагытыште тудо ургаш кумылаҥын. Варажым пелашыжын аваже Валентина Ивановна дене пырля марий тувырым ышташ тӱҥалыныт. Ольга урген, аваже чыла кид дене тӱрлен. Кызыт ты пашам куштылемдаш манын, Ольга тӱрлымӧ машинам налын. Марий вургемже-влакым Марий Элын тӱрлӧ районыштыжо, Москош, Йӱдвелыш, Екатеринбургыш, Озаҥыш да моло кундемыште налыт.
– Валентина Ивановна Кугу Лумарий школым вуйлатен, руш йылмым туныктен. Школышто пашам ыштымыж годымак шуко пидын. Кызыт тудо сулен налме канышыште. Пытартыш жапыште тӱрлаш чот кумылаҥын. Тыгай ешыш пурымеке, мыят кидпашам ышташ утыр кумылаҥынам. Тыгодым декрет жапыште мӧҥгыштӧ шинчаш йокрок лийын. Интернет гоч ургаш тунемым. Курткым, комбинезоным, йолашым, тувырым да моло вургемым ургенам. Тидыже мыйын чон каныш пашаш савырнен. Ялыште паша шуко гынат, кастене ургаш шинчаш жапым муынам.
Марий тувырым йодшо-влак шагалын огытыл, заказ-влак чӱчкыдын пурат. Ме ӱдырамашлан, пӧръеҥлан, йоча-влаклан марий костюмым, тувырым ыштена. Февраль марте вич тувырым ямдылен шуктышаш улына.
Материалым шкеак налам. Пытартыш жапыште тудо моткоч шергештын. Еҥ-влак утларакшым хлопокан, йытын тувырым йодыт. Кид дене тӱрлымым поснак аклат.
Ургаш писын лиеш. Пел кечыште тувырым урген кертам. Но кид дене чыла тидым тӱрлен шинчаш кок але кум арня жап кӱлеш. Авамлан полшаш манын, тӱрлымӧ машина дене тӱрлаш тӱҥалынам. Тыге икмыняр заказым ыштенам.
Ты паша моткоч ответственный, йодшо еҥлан келшышым урген моштыман. Южгунамже жап шагалла чучеш, – мане О.Соломина.
Еҥ-влак ик тувырым але тичмаш костюмым йодыт. Тидын годым ак тӱрлӧ лиеш. Ончыкылан марий вургемлан тӱрлӧ сӧрастарышым ямдылаш кумылышт уло.
Ольга тыгак крючок дене сайын пидеш. Тидлан тудым эше школышто тунеммыж годымак акаже туныктен. Тунам ӱдыр шальым, кофтым, упшым, носким да молымат пидын. Кызыт жап шагаллан кӧра ты пашалан огеш пиж.
Соломинмыт кок эргым ончен куштат, кызыт кумшо йочам вучат. Сай озавате семын Ольга ешыжым тӱрлӧ шере кочкыш дене куандара.
Тыгайрак тачысе лаштыкнан кидмастарже. Самырык, чолга, илыш дене тӧр кайыше, шонымашке шушо. Тудым Марий Элыште веле огыл, таче ӧрдыж кундемлаштат шукын палат. Марий тувыржым куанен налыт. Тидыжым ик эн кугу паша лектыш семын палемдыман.
О.Соломинан фотожо-влак.