10 июньышто Екатеринбургышто Ага-Пайрем эртаралтын.
Тений тудо Екатеринбург олалан 300 ий темме дене кылдалтын. Марий-влакын пайремышт «Эльмаш» тӱвыра рӱдерын еш дене каныме паркыштыже лийын.
Свердловск областьысе марий-влак Агавайремым Ага пайрем маныт да Ага-Пайрем манын серат. Тушко марий калыкын илыме чыла районжо гыч толыт. Тидлан оҥай программым ямдылат. Ты ганат марий калык модмаш ден таҥасымаш, йоча модыш-влак эртаралтыныт. Тыгак марий коллектив-влакын концертышт лийын. Кидмастар ден уста еҥ-влакын пашаштым ончалаш «Город мастеров» площадкым чумыреныт.
Пайрем веселан эртен.
Фото-влакым Екатеринбург олаште илыше марий-влакын автономийыштым вуйлатыше Н.Ябекован соцсетьысе лаштыкше гыч налме.