15 октябрьыште Ялысе ӱдырамаш-влакын тӱнямбал кечышт палемдалтеш. Тендан шонымаште, кызытсе саманыште могай тудо, ялысе ӱдырамаш? Молан те ялысе илышым ойырен налында да тушто илаш мо дене келша? Олаш илаш куснаш иктаж гана шоненда?
Нина Аркадьева, Морко район:
– Ялысе ӱдырамаш ур гай писе, пашалан кожмак, чыла ыштен моштышо, ешым кучышо, икшывым йӧратен ончен куштышо ава. Ялысе ӱдырамаш влак кызыт модный улыт, моторлык шотышто оласе вате-влак дечат вараш огыт код, илыш дене тӧр ошкылыт. Кидыштат, ӱпыштат, чурийыштат чатка. Тӱрлӧ кундемыште канашат жапым муыт. Сурт-печыштат мотор да пеҥгыде. А пакчаштышт могай гына пакчасаскам ончен огыт кушто?! Пеледышышт нерген ойлыманат огыл. Яра жапыште ялыште икте тӱрла, весе урга, кумшо сӱретла, интернет полшымо дене моло сомылланат тунемыт.
Ялыште шочмемлан ом ӧкынӧ, куанем гына. Вет мланде да пӱртӱс деч вийым налын илаш – кугу пиал.
Людмила Алгаева, Шернур район:
– Мыйын шонымаште, кызытсе ялысе ӱдырамаш чыла ыштен моштышаш: кочкашат шолтышаш, пудамат пудалышаш.
Шке жапыштыже Йошкар-Олаште ныл ий иленам да ялыш пӧртылынам – пӱртӱс лоҥгаште илаш путырак келша. Адакшым ялымат тӱзатен шогыман, чылан олаш илаш куснат гын, ялыште кӧ кодеш? А ынде, шочмо пыжашым коден, иктаж олаш илаш кайыме нерген шонымаш огешат лек. Ялыште паша эре шуко, но тиде мыйым ок лӱдыктӧ.
Марина Иванова, Морко район:
– Кызытсе саманыште ялысе ӱдырамаш оласе деч огеш ойыртемалт, шонем. Тудо сурт сомылкамат ыштен шукта, шке машинашкыже шинчын, пашашкат кудалеш. Икшыве-шамычланат жапым муэш.
Ялыште кызыт чылан интернет дене пайдаланат, садлан илыш дене тӧр каят. Пакчалан, сурт-печылан мо кӱлешым онлайн-кевытлаште заказатлен, йырышт моторлыкым, арулыкым ыштат. Мыланем ялыште илаш моткоч келша. Олаш миен толмо шумо годым шинчына да кудалына.
Еш альбом гыч налме фото-влак.