Кажне еҥын – шке пӱрымашыже. Илышем шотышто вуйым шияш амал уке. Пелашем дене ик ял гычак улына. 35 ий ваш келшен, йӧратен илена. Мый тракторист улам, ватем – повар. Коктынат колхозышто тыршенна. Вич ӱдырым ончен куштенна. Изинек пашалан кумылаҥденна, поро дене илаш туныктенна. Чыланат мутым колыштшо, пашам йӧратыше лийыныт, тунемашат кертыныт. Нылытын кӱшыл шинчымашым налыныт. Эн пытартышыже ик вузышто 5-ше курсышто тунемеш. Чыланат пашам ыштат.
Но икте кумылым волта: иктыжат марлан каен огыл. Иктаҥашыже-влак чылан гаяк ешан, шочшан лийыныт. Чатка капкылан, мотор чурийвылышан ӱдырем-влак рвезе-шамычын чонышкышт ала-молан огеш пиж. А ача-аван чонжо шочшо верч ойгыра. Ме ынде коча-кова лияш шукертак шонена, но чыла арам. Ӱдыр-влаклан тидым эре тӱен ойлена гынат, нуно пуйто мемнам огыт кол, шыдешкат веле.
Ӱдырем-влакын ончыкылкышт верч Юмыла кумалам, сайлан ӱшанем. Тек илышышт воранен кая, пиалан лийыт.
Александр.
Кужэҥер район.