Уныка-влакат полшат

Ялыште кеҥежым  шокшым кӧргалтен пашам ыштет гын, телым шужен от шинче. Икте снегым, модым поген, оксам ышта, весе вольыкым ончаш кургым ямдыла, пакчасаскам кушта. Эре тыге лийын: ялыште кажне суртышто паша шӱй даҥыт гынат, чыла ыштен шуктеныт.

Морко районысо Шордӱр ялыште  верысе клубышто худруклан пашам ыштыше Эльвира Максимован  ешыжат моткоч пашаче.  Эрик пелашыже дене коктын 1987 ийыште ушненыт, 32 ий пырля илат. «Володя ден Алёша эргына-влак улыт. Володя ешан, тудын  Николай эргыже да Снежана ӱдыржӧ кушкыт. Медведево районысо Арбан ялыште илат. Ешаҥмек, ондак икшывым ончен кушташ, вара вес пел ӱмыржым уныка-влаклан пӧлеклаш тыршет. Изи падыраш-влак мемнам моткоч куандарат, нуным ончалат да нойымет пыта, илымет веле шуэш. Пелаш денат осал мут дене пелештымашна уке», — ойла озавате.

Теве Максимовмыт еш  шудым рӱж поген нале. Кок ушкаллан, презылан курго ситышын лие. Тыгак сӧснам, чывым  ашнат. Вет чыла тидым ончет да веле  шке кочкыш йӧрваран лият. «Шудым сайын поген налаш эре Юмым сӧрваленам.  Ты гана тудо мыланна моткоч полшыш. Кугу тау», — мане Эльвира Валерьевна.