Эр лупс мушкеш чара йолемым,
Кас ӱжара ӱпем пуна…
Мый почым качылан чонемым,
Лыжга мардеж мемнам вӱчка.
Ты почеламут корныла лудшын чонжым тарватат. Тудым самырык возышо, чолга студентке Кристина Быкова серен. Ӱдыр Кужэҥер районысо Одывлак ялыште шочын, Лопсола ялыште кушкын. Кызыт МарГУ-со Калыкле тӱвыра да тӱвыра кокласе коммуникаций институтышто нылымше ий тунемеш.
Сылнымут корно
Кристина изиж годсек усталыкше, мастарлыкше дене ойыртемалтын. Почеламутым сылнын лудын, кушташат тале лийын, тыгак спортым йӧратен. Тӱрлӧ конкурсыш, таҥасымашыш ушнен, Коҥганур кыдалаш школын чапшым шуко гана нӧлтен.
– Школышто руш да марий литератур предмет-влак чонемлан лишыл лийыныт. Туныктышем почеламутым сылнын лудын моштымем шекланен. Тудлан кӧра мый ятыр конкурсыш ушненам да эре сеҥышыш лектынам.
10 ияшем годым шочмо ялем нерген икымше почеламутым возенам да тудым туныктышемлан ончыктенам. Нина Гавриловна Каширская «Ямде лий» газетыш колтен. Савыкталтмеке, ты газетым лудаш пуэн. Мый моло ӱдыр-рвезын возымыштым лудынам да шкежат сераш кумылаҥынам. Тышеч юнкор корнем тӱҥалын. Мый тӱрлӧ очеркым, заметкым, почеламутым колтеденам. 2014 ийыште юнкор слётышто лийынам, – манеш Кристина.
Визымше классыште тунеммыж годым, ӱдыр сермым чарнен ыле. Но университетыш тунемаш пурымеке, угыч возаш кумылаҥын.
– Ешем деч тораште илаш тӱҥалынам, чоныштем лекше тӱрлӧ шижмаш нерген нигӧлан каласкалаш ыле, сандене шонымашем-влак кагазыш возыныт. Тунемме годым поэтессе Светлана Григорьевналан, почеламутемым тергаш колтеденам, тудо йоҥылышем тӧрлен, каҥашым пуэн. Тыгак «Кеҥеж сылнымутчо» семинарыш ушненам. Тушто Зоя Дудина возымемым лончылен. Ты семинарлан кӧра моло писательын усталык корнышт дене палыме лийынам. Почеламутемын тӱҥ темыже: йӧратымаш, ава, шочмо кундем да пӱртӱс, – ойла самырык возышо.
Кристинан 17 почеламутшо уло. Нуно «Ончыко» журналыште савыкталтыныт, тыгак ӱдырын «ВКонтакте» лаштыкыштыже лудаш лиеш.
Марий йылмым туныктышо
К.Быкова марий йылмым туныктышо лияш ямдылалтеш, нылымше курсым пытара. Тыгай профессийым ойырен налынат манын йодмылан тыге вашештыш:
– Мый икшыве-влак дене шогылташ йӧратем, шольо ден шӱжар-влакым онченам, нунын дене шуко жапым эртаренам. Сандене ты профессийым ойырен налынам. Шарнем, кугурак классыште тунемме годым регион-влак кокласе олимпиадыш коштынам. Тудо МарГУ-н Калыкле тӱвыра да тӱвыра кокласе коммуникаций институтыштыжо эртен. Тыштак университет нерген келгынрак пален налынам да тышке тунемаш толынам.
Студент пагытшымат Кристина пайдалын эртара.
– Икымше курсышто тунеммем годым «Голос юности» фестивальыште марий куштымашым ончыктенна, кугурак курсышто шанче конференцийыш, олимпиадыш ушнаш тӱҥалынам. Книгам лудаш йӧратымем марий литературым шымлаш кумылаҥден. Сандене «Финн-угор калык-влакын поянлыкышт» форумыш, Игнатьев лудмаш конференцийыш уло кумылын ушнем, – ойла ӱдыр.
Кристина кокымшо курсышто тунеммыж годым «Артек» тӱнямбал йоча рӱдерыште вожатыйлан пашам ыштенам. Тидлан лӱмын тунем лектын.
– «Артекыште» пашам ыштыме тунеммаштемат полшен. Ме МарГУ-што педагогике да психологий дисциплиным дене теорий шинчымашым налынна гын, ты рӱдерыште нуным практикыште кучылтынна, – палемда студентке.
Яра жапше годым ӱдыр йолташыже-влак дене вашлиеш, книгам лудеш, тыгак ялыш миен толеш. Шуко жапым тудо тунеммылан ойыраш тырша. Ӱдырын тӱҥ шонымашыже – университетым тунем пытараш да шке пашам сайын палыше специалист лияш.