Угарман кундемысе Шараҥ районысо Каремсола селасе «Марий пӧрт» пӧрт-тоштерыш кажне кеҥежым шуко уна толеш.
Август мучаште Моско, Тверь областьысе Конаково, Моско областьысе Зарайск да Угарман кундемысе Тонкин район Новое Тонкино ял гыч уна-шамыч марий тӱвыра дене палыме лияш лӱмынак толын каеныт.
Уна-шамычлан Каремсола книгагудын пашаеҥже-влак эн ончычак «Марий пӧрт» пӧрт-тоштерыште экскурсийым эртареныт. А нуно марий калыкын тӱвыраже, тыгак кӱсотышто кумалмышт да юмыйӱлашт нерген йодыштыныт. Варажым марий калыкын ик эн тутло кочкышыжым – мелнам – мастер-классыште кӱэшташ тунемыныт. Уна ден организатор-влак ӱстембал йыр погынен, мелнам тамленыт, чайым йӱыныт.
Тӱрлӧ кундем гыч толшо-влак марий калыкын арален кодымо тӱвыра поянлыкше дене кугешнен ойленыт да оҥай экскурсийлан тауштен коденыт.
Эльвира Терентьева.