Марий Элысе янлык тӱня департаментыште республикыште вӱд воктене илыше янлык-влакын чотыштым иктешленыт.
2023 ийлан 13 тӱжем ондатр, 6,6 тӱжем умдыр (бобр), 1,4 тӱжем шашке (норко), 300 утла вӱдкома (выдра) уло. Нине янлык-влакын чотышт 2022 ийысе дене икгайрак, маныт.
Эн шуко ондатр ден умдырым Юрино районышто верештме, шашке ден вӱдкомам – Килемар районышто. Ондатр Марий Турек, Медведево, У Торъял да Советский районлаште шукемын. Умдыр Волжский, Курыкмарий, Кужэҥер, Медведево, Шернур, Советский районлаште ешаралтын. А шашке Курыкмарий, Килемар, Медведево, У Торъял, Параньга районлаште шуко.
Тений кеҥеж чот шокшо лийын, тыге изи эҥер ден ер-влак кошкеныт. Тидлан кӧра нине янлык-влакын кочкышышт шагалемын.