Кызыт Российысе чыла кундемыште «Всей семьей» акций эртаралтеш. Тушко кумылан кажне еш ушнен кертеш.
Еш-шамыч 10 заданийым шуктышаш улыт. Тидын дене https://vk.com/vseysemiey соцкылыште але https://xn--b1agaasct0bc6i.xn--p1ai/ сайтыште палыме лийын кертыда.
Нине заданий-влак еш дене пырля лияш эше ик кугу йӧным пуат. Ты проект Российыште Еш идалыкым эртарымылан пӧлеклалтеш.
Тышке Волжский район Мучашъер ялыште илыше Кудрявцевмытат ушненыт. Екатерина Арсентьевна ден Алексей Леонидович республикын чапшым ятыр еш конкурсышто араленыт да сеҥышыш лектыныт. Ача-ава шке шочшыштым марий тӱвыралан да йӱлалан кертмышт семынак кумылаҥдат.
Екатерина Арсентьевна Волжский районысо рӱдӧ клуб системым вуйлата. Алексей Леонидович – телемеханике шотышто инженер.
Шуко шочшан ешысе чыла еҥ ты проектыш ушнаш вигак келшен огыл. Молан манаш гын чыланак йыгыре огыт иле, тӱрлӧ вере тунемыт.
Тидын нерген ава тыгерак ойла:
– Ты сомылыш ушнаш мыйын шонымашем шукташ полшыш. Кунам чыла шочшына-влак шочмо пыжашыштым коден каят, кажне рушарнян кечывал кочкышым ышташ да мончаш пураш мӧҥгышкӧ толышт манын шонкаленам. Кызыт мемнан студентна-шамыч кажне гана йодыт: «Проектын заданийже-влакым шукташ толман мо?» Тыге мыйын шонымашем шукталтеш.
Кудрявцевмыт пырля пашам ыштат, пырля канат. Шукерте огыл Пызьыргуп тӱвыра пӧртыштӧ Еш идалыклан пӧлеклалтше отчётный концертыштат сценыш лектыныт. Ава куштен, Мирон мурен, Софья ден Павел клоун лийыныт, ачашт йӱк операторын пашажым шуктен, а Егор ден Андрей нунылан совым кыреныт.
Икманаш, Кудрявцевмыт эре илыш дене тӧр каят. Шашке дене «пукшымыла» модмыштым, книгам лудмыштым, моло заданийымат шуктымыштым ончаш оҥай. Тек тыгай куан кажне ешыште лиеш.
Эльвира Терентьева.