12 майыште Москошто ВДНХ-ште «Россий» тӱнямбал выставке-форумышто сӱан фестиваль почылтеш. Тушто элнан тӱрлӧ кундемже гыч 150 у ешым официально регистрироватлат. Нунын коклаште кок мужыр Марий Эл гыч, иктыже – Наталья Шустова ден Никита Федосеев. Ӱдыр-каче вузышто тунеммышт годымак палыме лийыныт. Коктынат Йошкар-Ола гыч улыт, МарГУ-со физико-математичесий факультетын ик группыштыжо шинчымашым нӧлтеныт, ик тӱшкаштак каненыт. Наталья ден Никита велосипед дене кудалышташ йӧратат. Садлан коктын чӱчкыдын пырля жапым эртареныт. Тыге кумшо курслан ӱдыр-каче семын келшаш тӱҥалыныт.
– Ме шымше ий пырля улына. Бакалавриатым пытарымеке, магистратурыш тунемаш коктынат пуренна, – мутланымашым тӱҥале Наталья. – Тольык магистратур деч вара тӱрлӧ вере пашаш каенна. Мый – Москосо ик IT-компанийыште системный аналитиклан тыршем, Никита – промышленный автоматикын программистше. Шымше сентябрь – мемнан пайремна, тудым ме кажне ийын палемдаш тыршена. Вет ты кечын ме келшаш тӱҥалынна.
Тиде рушарнян Наталья ден Никита официально вате-марий лийыт. Мужыраҥме кечыштат ойыртемалтшын эрта. Вет нунылан эше ятыр мужыр дене пырля сӱан шествийыште ошкылман. Программе почеш ВДНХ-се тӱҥ арке дене чыланыштым вашлийыт. Эн ончыч фотосессий лиеш, вара шествий тӱҥалеш. Тылеч вара сӱаным торжественно регистрироватлымаш да самырык-шамычын икымше куштымашышт. Тыгак фестивальын официальный ужашыжым, саламлымашым эртарат. Пытартышлан флешмобым да шӱдыр-влакын концертыштым ончыктат. Мероприятийым мучашлымеке, мужыр-влаклан паспортыштым кучыктат.
– Уло эллан Марий Эл гыч самырык мужыр семын шкенам тушто ончыкташ, мутат уке, мыланна кугу чап. Садлан изиш тургыжланымаш шижалтеш. Туге гынат ме ямде улына. Фестиваль годым марий сӱан вургемым чиена. Костюмым мыланна Эрик Сапаев лӱмеш опер да балет театр лӱмын урген. Тудо мотор, шкешотан, торашке волгалтше.
Конешне, тыгай кугу мероприятий деч вара шке сӱаннам родо-тукым да еш дене пырля эртараш шонена. Садлан, Моско гыч пӧртылмеке, пайремым кумдан палемдена, – палдарыш Наталья.
ВДНХ-се «Россий» выставке-форумышто кажне гана могай-гынат фестиваль, мероприятий, кече-влак эртаралтыт. Марий Эл тӱрлӧ вере шкенжым чолган ончыкта, ушнаш тырша. А ынде ӱдыр-качын марий сӱан вургем дене войзалтмыштым ончаш тӱҥалына.
Н.Шустован альбомжо гыч налме фото.