Советский район Михайловка селаште шочын-кушшо 37 ияш Вася Ильинын спецоперацийыште лиймыж нерген аваже Галина Александровна Ильина дене шергална.
Эргыжын илышыже кодшо ий 5 февральыште кӱрылтын. Аван кочо шинчавӱдшым ужаш путырак неле. Ты кочыжо ава шӱмеш эрелан шыҥымымат шижат, могай мут дене паремдашат от пале…
Ильинмыт вич шочшым (кум эргым да кок ӱдырым) ончен куштеныт. Кузе марий калыкмут ойла, кеч ик парнятым пурл але пӱч, икгаяк коршта. Ача-авалан чыла икшывышт икгай шерге.
Эрге-влак чыланат армийыш миен толыныт да Йошкар-Олаште лакемыныт. Василий ондак шке ешыж дене Ставропольский крайыште илен. Варажым шочмо кундемышкыже, Советский район Михайловка селашке, пӧртылын. Икмыняр жап гыч ешге Йошкар-Олашке илаш кусненыт.
В.Ильин корным ыштыше организацийыш пашаш пурен. А 2022 ий октябрьыште тудым мобилизаций почеш СВО-ш наҥгаеныт.
Тений СВО участникын кугурак эргыже 5-ше классыш вончен, ӱдыржӧ – 3-шо классыш. А эн изиже сентябрьыште кум ийым тема. Ачажым ужде илыше талукаш изи ӱдыр шуко еҥым «Ачай» манынат ойледен.
Галина Александровна Морко район Кугу Шале ялеш шочын да Арын Чодраялыште илен. Варажым Советский кундемыш Вӧдырлан марлан толын. Эре тысе озанлыкыште дояркылан ыштен. Пенсийыш лекмекыже, тӱвыра пӧртымат мушкын.
Г.А.Ильина шинчавӱд йӧреак эргыж нерген каласкалыш:
– Вася мыланем пеш йыҥгыртенат огыл, нимомат ойлен огыл. 2023 ий 5 февральыште колен, 17 февральыште тоенна. Кум йочаже тулыкеш кодын. Армийыште пулемётчик лийын. Младший сержант званиян. Тюменьыште армийыште служитлымек, контрактым подписатлен да Карачаево-Черкессийыште кум ий лийын, тыгак Самара олаште порысшым шуктен.
Вася пелашыжлан йыҥгыртен да каласен: «Теве пытартыш штурмыш каем, вара отпускыш толам». Но отпускыш колтен огытыл, а икмыняр жап гыч йӧршешлан мӧҥгыжӧ пӧртылын…
Мутланымашыш СВО участникын аваже Татьяна Ивановна Балабаева ушныш:
– Командирышт, Артур эргым, сусыргымеке, Васям штурмышко колтеныт улмаш. Кугарнян связьыш лекташ ойлышо еҥ дене кыл пел ийлан кӱрылтын ыле. Ме Галя дене тудым шуко вере кычална. Военкоматыш, командирже-шамыч деке лектынна. Но нуно «Огына пале» манын веле ойленыт.
Пытартыш гана мыланем Вася 18 июньышто йыҥгыртен. Мыланем ойла: «Таня акай, Артурдан еш фотокартычкыжым, телефонжым муынна, чыла колтена». Тылеч вара ик йыҥгырат лийын огыл.
– Василий У ий вашеш гына связьыш лектын кертын. Тунам аважлан пайремлан пӧлек шотеш ватсап дене У ий саламлымашан видеом войзен да Саша эргым деке колтен.
А мыйже умылен омыл, «Вася, толынат мо?» манам. Эргым ден шешкым мыйым воштылыт. Тудо ватсап дене гына колтен, декабрьыште веле штурм гыч лектын кертыныт улмаш. А мыйже йывыртенам. Кузе от куане?! Эргымым пел ий ала-куштат кычал коштынам да… – умбакыже каласкала Галина Александровна.
Тыгай уверым налмеке, Галя кокай вигак Татьяна Ивановна дек пӱтыралын: «Таня, Васям связьыш лектын». Тунам ӱдырамаш-влак ятыр жап телефон дене шортыныт…
Варажым Василий Т.И.Балабаева деке йыҥгыртен. Тунамат Татьяна Ивановна шинчавӱдшым кучен кертын огыл. А Вася тудым лыпландарен: «Ит шорт, теве вашке толам, вара куанымет дене шорташ тӱҥалат».
– Тыгай шомак деч вара Васян уке лиймыжлан пытартыш марте ӱшанен огынал. Кондымекыштат, тудак мо манын йодынна. Ала тудо огыл, шоненна. Санденак моргышто колтокам почыктенна, – манеш Татьяна Балабаева.
– Васялан костюмым чиктен пыштенна. Тудлан Ростов гыч кугу кемым, пел носким да вес еҥын вургемжым чиктен колтеныт. А Васян Ирина акажлан омыштыжо тудо эре военный вургем дене коеш. Сандене военный вургемым налын ушташ шонена.
Кызыт Галина Александровна чонжым лыпландараш носким, парняшан перчаткым пидеш да спецоперацийыш колта. Теве еҥ-влак Галя ковайлан межым пуэныт. Тудым шереш, шӱдыра, мундырам ышта да салтак-влаклан шокшо пиж ден носким ямдыла. Ончычшо тудо эре Васям вучен да пидын. «Вася толеш гын, пуэн колтем» шонен. Кеҥежым гын кевытыште носким наледен колтеда. «Эргым уке гынат, олмешышт вес салтак-шамыч чият», – манеш кумыл тодылалтын Галя ковайна.
15 августышто Галина Александровна 75 ияш лӱмгечыжым палемден. Ты кечын Советский район гыч СВО участник-влакын ача-ава ден йочаштым Юриносо Шереметев замокыш экскурсий дене намиеныт. Г.А.Ильина ден Т.И.Балабаева тидым пӧлек шотеш ужыныт.
Эльвира Терентьева.
Фото-влакым еш альбом гыч налме.