7 апрельыште Морко районын 100 ияш лӱмгечыжлан пӧлеклалтше «Шочмо велын мурсемже» концерт М.Шкетан лӱмеш Марий драмтеатрыште эртаралтын.
Тушто районысо ятыр коллектив эн сай да ойыртемалтше номерлажым ончыктен. Сценыште нуно ончычсо семынак пеш моторын койыныт да ты кундемын мастар памаш улмым эше ик гана пеҥгыдемденыт.
А тылеч ончыч, 29 мартыште, Морко районысо тӱвыра пӧртыштӧ «Морко велым моктен мурена» районысо смотр-конкурсын гала-концертше эртаралтын. Тудат районым ыштымылан 100 ий теммылан пӧлеклалтын.
Рӱдолаште лийше чапле кугу концертыш шуко еҥ шке мастарлыкшым пыштен да тидлан кӱлынак ямдылалтын. Морко районын Йошкар-Оласе землячествыжат ты концерт вашеш погынымашым эртарен да тӱрлӧ йодышым каҥашен.
Мероприятий кок шагатат пеле шуйнен. Тидлан сценарийым возышо ден концертым вӱдышӧ, тӱвыра пӧртласе ансамбль-влак да нуным вуйлатышышт, моло артист ден мурызо, режиссёр ден йӱк режиссёр да молат пашам ыштеныт. Эсогыл «Морко районлан – 100 ий» возыман тортымат кӱэшт конденыт.
Калыкат зал тич лийын. Ончаш толшо-влак концерт гыч куаныше каеныт.
