Марий УФСИН-ын пашаеҥже-влак судитлыме да оролымаште улшо еҥ-влакым конвоироватлат.
Российыште конвой службын историйже Александр III императорын указше почеш 1886 ий 20 январьыште тӱҥалын. Ты указ дене арестант-влакым ужатен каяш лӱмын конвой командым ышташ кӱлын. 1998 ийыште Россий Президентын указше почеш 20 январьым УИС-ын конвоирований шотышто специальный подразделенийжын кечыже семын увертарыме.
Кызыт Россий УФСИН-ын Марий Элысе управленийжын конвоирований пӧлкаштыже 39 еҥ тырша. Ты подразделенийым 1996 ийыште ыштыме. Розыск, конвоирований да обеспечений ротын (тунам кызытсе пӧлка тыге маналтын) икымше командиржылан Родион Ксенофонтовым шогалтыме. Икымше ийынак 160 караул лийын, 4500 судитлыме еҥым ужатен каеныт.
Таче пӧлкаште судитлыме еҥ-влакым коштыкташ вич специальный машина уло. Ӱмаште гына тусо пашаен-влак 3500 судитлыме да оролымаште улшо еҥым наҥгаеныт.
Подразделенийын пашаеҥже-влакым профессиональный пайремышт дене республикысе УФСИН-ым вуйлатыше Игорь Третьяков саламлен.
