9-13 июньышто Нижний Новгород олаште Российысе самырык-влаклан «Диалог культур» межнациональный лагерь эрта.
Тӱвыра илыш дене кылдалтше тиде погынымашке Российын 60 регионжо гыч 200 наре самырык еҥ ушнен.
Лагерь тӱрлӧ калык кокласе кылым пеҥгыдемдаш шонен эртаралтеш. Участник-влаклан туныктымо программым ямдылыме, эксперт-влак дене ужын мутланаш йӧн ышталтеш, кучем вуйлатыше, культурышто да бизнесыште тыршыше-влак дене шуко вашлиймаш эртаралтеш.
9 июньышто лагерьын участникше-влак Нижний Новгород олаште экскурсий деен лийыныт. Кум шагат жапыште Угарман кремльым, Александро-Невский Новоярмарочный соборым шымленыт.
Кастене организатор-влак участник-шамычым шке коклаште палымым ышташ тӱрлö модышым эртареныт.
Тыге ӱдыр-рвезе-влак икымше кечынак ятыр кундем гыч йолташым муыныт.