Медведево посёлкышто илыше Н.Боброва, помышышкыжо изи пийжым чыкен, кажне кечын гаяк Нурма селаш кудалыштеш – тушто, шочмо сурт олмыштыжо, пашазе-влак пӧртым чоҥат.
Вашке чапле у пӧрт лиеш
– Кугурак Люба ӱдырем ешыж дене, Пембыште пӧртыштым ужален, тыште ик пачашан пӧртым нӧлташ шонен пыштеныт. А мый пашазе-влакым кажне кечын вашлиям да ужатем. Люба Медведево посёлкысо йочасадыште пашам ышта, Саша веҥымат – эр гыч кас марте пашаште, садлан шкешт огыт ярсе, да мый паша вораҥмым эскерем, – умылтарыш ӱдырамаш.
Такшым Нина Валентиновна тылеч ончычат, лум шулен пытымеке, кажне кечын селаш ий еда кудалыштын. Тыште тудын – сад-пакчаже. Шке манмыжла, чылажымат изиш дене шында. Тений пакчаштыже эше теплицым вераҥденыт. Но пеледышыже шагал манаш ок лий. Лум кайымек пеледаш тӱҥалыт. Кылме толмеш тӱрлӧ пеледыш шке моторлыкшо дене икте почеш весе куандара. Тюльпан ден пионжак ятыр тӱрлӧ уло. Розам гын 20 наре сортым шынден. Телылан леведмаш уке, южыжо кылма, садлан кажне шошым эре наледен шындем манын рашемдыш озавате. Пеледыш йыраҥ воктене грушо одарланен кушкеш. Тений пушеҥге ошын койын пеледын, шере саскаж дене куандарышаш.
Ялыште ласка
Н.Боброва ешыштыже визымше, межнеч, икшыве лийын. Нурма школышто ондак кум классым гына туныктеныт, садлан Арбан пошкудо ялыш йолын коштыныт. Школ деч вара Йошкар-Олаште тӱрлӧ вере пашам ыштен. Медведево посёлкыш марлан лектын, ешыште кок ӱдыр да ик эрге кушкыныт.
– Ынде сулен налме канышыште, шым уныкан кова улам. Пелашем 40 ияшак илыш дене чеверласен. Авам колымылан 24 ий лийын, но шочмо селаш кудалыштмым чарнен омыл. Кеҥеж жапем лач тыште эрта. Кечыгут тыршымеке, мончаш пурен, могырым кандарыме деч сайже нимо уке, – ойла тудо.
Нина Валентиновнан палемдымыж почеш, пытартыш ийлаште Нурма селаште утларак у пӧрт-влакым чоҥаш тӱҥалыныт, села кушкеш. Йошкар-Олаште илыше-влак, мландым налын, шке пӧртым чоҥат. Вет рӱдола гыч кудалышташ тора огыл. Озаватын Медведевысе пӧртшӧ марте, мутлан, 9 меҥге гына.
Айдемылан веле огыл пӱртӱс лоҥгаште, яндар южышто ласка. Н.Бобровалан икшывыже-влакын пӧлеклыме Кети лӱман изи урлык чихуахуа пинегыжат посёлкысо пачерыште ынеж ок код. Ныл йолан йолташыже, озаватын эрдене селаш каяш ямдылалтмыжым шижешат, омса воктеке толын шинчеш. Кеҥеж каникуллан Нина Валентиновна дек селашке икшывыже, уныкаже-влак погынен толыт. Тунам участкыже йоча йӱк дене йоҥгалтеш. У пӧртым чоҥымеке, тушто эшеат весела лиеш.
Авторын фотожо-влак.