Советский район Ӱшнӱр школышто тунемше Александра Морозова марий йылме дене олимпиадылаште чӱчкыдын сеҥышыш лектеш. Кок ий ончыч республикыште кокымшо верыште лийын, ӱмаште сеҥышыш лектын. Ик ий ончыч регион-влак кокласе олимпиадыште икымше вер дене палемдалтын. Теният тудо – икымше!
Александра Морозова:
«Марий йылмым туныктышо Зинаида Александровна Волкова дене пырля перемен жапыште да урок деч вара тӱрлӧ заданий-влакым лончыленна, кодшо ийласе паша-влакым шергалынна. Мӧҥгыштат ямдылалтынам. Регионысо олимпиадыш логалаш манын, эн ондак школысо, вара муниципальный да республикысе этап-влакым эртенам. Кум вережат сеҥыше лийынам. Ончыл радамыш логалаш шоненам гынат, тургыжланымаш садак лийын».