«Культура» нацпроект почеш республикысе ныл районышто кинотеатрым ачалыме: Марий Турек, Оршанке, Килемар да У Торъял районлаште.
Марий Турек район У ийым уэмдыме кинозал ден книгагудо дене куанен вашлиеш. Олмыктымо деч вара нуным 22 декабрьыште торжественно почмо.
Районысо «Заря» кинотеатрын уэмдыме кинозалжылан калык путырак куанен. Кызытсе жаплан келшыше у кинооборудований-влакым вераҥдымылан да ший тӱсан экранлан кӧра кинофильмысе сӱретат волгыдырак коеш. Цифровой кинозалым ышташ Отечественный кинематографийлан социальный да экономический полышым пуышо федеральный фонд 9 миллион теҥгеаш субсидийым колтен.
Марий Турекысе межпеоселенческий рӱдӧ книгагудышто кӱвар ден окна-влакым вашталтыме, пырдыжым, туврашым чиялтыме. Тылеч посна библиотеке пашаеҥ-влак лудшо-шамычлан йӧнан условийым келыштареныт. Тыште книгалан толын каяш веле огыл, тысе залыште шке жапым кумылын эртараш лиеш. Тӧнежыште тыгай сай паша тений ышталтмылан Марий Турек районысо администрацийлан кугу таум каласат.
«Ты ачалымаш книгагудым модельныйыш савырыме шотышто тӱҥалтыш сомыллан шотлалтеш», – манын Марий турек район администрацийым вуйлатыше С.Решетов. Тугеже книгагудо ончыкыжым эшеат мотор лийшаш.
Фотом районысо администрацийын сайтше гыч налме.