Марий Эл Республикысе клинический эмлымверын офтальмологий поликлиникыжым «Здравоохранений» нацпроект почеш капитально ачалыме. Тиде кечылаште тушко Марий Элым Вуйлатыше Ю.Зайцев миен коштын.
Тудо регистратурым, офтальмолог врач-влакын пӧлемыштым, диагностикым ыштыме, лазерный, операционный кабинетлам ончен лектын.
Ты оралтым 1976 ийыштак чоҥымо да ик ганат олмыктымо огыл ыле. Южо диагностикым ышташ еҥ-влакым Моско мартеат колтымо. Ынде нуно Марий Элыштат эмлалт кертыт.
Зданийын фасадшым тӧрлымӧ, пӧлемлам уэмдыме, омса, окна-влакым вашталтыме да моло пашам шуктымо. Тыгак тӱрлӧ оборудованийым налме.
Ю.Зайцевын мутшо почеш, йоча-влакымат эмлаш условийым саемдыме. Кумшо пачашыште нунылан кумда пӧлемым ойырымо.
Поликлинике ик сменыште Марий кундемнан тӱрлӧ верже гыч толшо 250 еҥлан полышым пуа.
Кокымшо пачашыште регионысо эндокринологий рӱдерым почаш шонат.