Тений Марий Элысе вич школышто спортзалым уэмдат.
Тиде пашам «Успех каждого ребенка» федеральный проектын «Образований» нацпроектше почеш шуктат. 2019 ий гыч Марий Элысе 30 школышто материально-технический базым уэмдыме. Тыге 28 спортзалым ачалыме, спорт оборудований дене 3 сооруженийым пойдарыме, школысо спортклубым вияҥдаш манын, ялласе, селаласе 13 школлан спортинвентарьым налме.
Тений ты проект почеш вич спортзалым ачалат да спорт инвентарь дене пойдарат. Тиде Кужэҥер, Марий Турек, Медведево, Морко да Советский районласе школлаште. 2025 ийыште ныл школышто физкультур дене заниматлаш условийым ыштат.