Заказ почеш тӱрлӧ мебельым ыштыше «Ударник» фабрике Йошкар-Оласе Строитель уремын 95-ше «Е» номеран зданийыштыже верланен. Директорлан Е.В.Наумов тырша.
Лекше йодышнам Кужэҥер кундемын шочшыжо, производствым вуйлатыше С.Г.Петров дене
рашемдышна.
– Сергей Григорьевич, тыгай аланыште тыршыше амалкалче кызыт шуко. Кажны-
жын – шке сатужо, ойыртемже. Тендан дене кузе сомыл шукталтеш? Могай мебель дене калыкым куандареда?
– Производствышто у технологийлан эҥертен, заказ почеш корпусный мебельым ыштена. Кухньым, прихожийым, тӱрлӧ шкафым да молымат. Полышым йодын толшо-влаклан рассрочко пуалтеш. Специалист-шамыч сай качестве верч тыршат. Моторын койжо манын, кызытсе илышлан келшыше тӱрлӧ йытыра фурнитурым, келшыше дизайным кучылтына.
Полышым районла гычат йодыт. Чылаштын кумылыштым шукташ тыршена. Организацийла, предприятийла дене кылым кучена.
– Пачерыш арверым налме годым дизайн шотышто эре йодыш лектеш. Тендан дене тыгай полыш уло?
– Мемнан кажне салонышто кум дизайнер дене тыршат. Нуно заказым налыт. Материалым, фурнитурым, тӱсым ойыраш полшат. Толшо еҥын илыме верышкыже мият. Мебель могай кугытан лийшашым висен, компьютерыште клиентлан иктаж кум тӱрлӧ эскизым ыштен ончыктат. Ик ойыш шумек, проектыштым цехыш колтат. Мебельым ямдылымек, адрес дене шкеак намиена, поген пуэна.
– Кухньылан кызыт утларакшым могай тӱсым кучылтыт?
– Шукылан сур але ошалге тӱс-влак келшат. Нуно кумылым нӧлтат да моторын коеш, маныт.
– Мебельын качествыже аралалтше манын, мом палыман да шотыш налман?
– Тидын нерген ме договорыш умылтарымашым пуртена. Материал вет тӱрлӧ лийын кертеш:вӱдыжгым, шокшым, нелытым чытыше да тулеч моло. Садлан улшо инструкцийым, правил-влакым сайын лудман, шарныман. Чылажат пайдале, кӱлешан.
Умбакыже 25 февральыште лекше номерыште лудса. Кевыт https://кугарня24.рф/shop/