ТАЧЕ, 13 июльышто, педагогике науко доктор, профессор, Марий АССР науко ден техникын сулло пашаеҥже, РСФСР наукын сулло пашаеҥже Захар Ильич Равкинын (1918-2004) шочмыжлан – 105 ий.
Ростов-на-Дону олаште 1918 ий 13 июльышто врач-влакын ешыштышт шочын. 1935 ийыште Москосо философий, литератур да искусство институтыш пурен, а 1937 ийыште Самаркандысе кугыжаныш университетыш кусаралтын. Тушто историйческий факультетым 1941 ийыште тунем лектын. Ты жап гычак школлаште историй ден литературым туныкташ тӱҥалын.
1944 ийыште РСФСР педагогике науко академийын аспирантурышкыжо пурен, икымше наборыш логалын. 1947 ийыште кандидатлык диссертацийым арален да тудым Педагогикын теорийже ден историйже иснтитутыш кугурак научный пашаеҥлан пашаш налыныт. 1951 ийыште Йошкар-Олашке толын. Тыште Марпединститутышто психологий ден педагогике кафедрым вуйлаташ тӱҥалын. 1966 ийыште педагогике науко докторын учёный степеньжым налме шотышто диссертацийым арален.
1981 ийыште Москошко пӧртылын да СССР-ын Педагогике науко академийын Общий педагогике инстиутыштшын пашаеҥже лийын. 1992 ийыште историко-педагогический шымлымаш методологий группыжым вуйлатен. 1995 ийыште РАО-н теорий да педагогике институтын тӱҥ научный пашаеҥжылан тыршаш тӱҥалын. Тыгак тудо 1985 ий гычак РАО-н теорий да педагогике проблеме шотышто научный советшын председательжылан шоген, СССР АПН-ын член-корреспондентше лийын, 2000 ий гыч – Россий образованийын академийжын действительный членже.
З.И.Равкин педагогике историй дене шуко научный пашам, икмыняр монографийым да учебникым савыктен. 1978 ийыште тудлан РСФСР наукын сулло пашаеҥже лӱмым пуэныт. «Знак Почёта» орден дене наградитленыт.
2004 ий 10 январьыште колен. Учёный-педагогым Йошкар-Оласе Туруново шӱгарлаште тойымо.