Республикысе Кугыжаныш Погынын коло визымше сессийыштыже Марий Элын вуйлатышыжын пашажым жаплан шуктышо Юрий Зайцев лийын.
Сессийыште депутат-влак чылаже 17 йодышым онченыт. Тышеч кокытшо республикын Конституцийышкыже вашталтышым пуртымо шотышто лийын. Депутат-влакын йӱклымышт почеш, у закон дене келшышын, Марий Эл вуйлатыше ынде тӱҥ документыште ончыктымо семын кок сроклан гына огыл, а утларакланат сайлалт кертеш. Вашталтышым Россий Конституцийлан келыштарен ыштыме.
Тидын шотышто Ю.Зайцев шке шонымашыжым ойлен:
‒ Айдеме пашам ышта, калыклан тиде келша гын, чарыман огыл, тек тырша ‒ мыняр ӱшанат, тунар вуйлатышылан шогыжо. Конституцийыште тыгай статья лач тиде шонымаш денак возалтын манын ӱшанлын каласен кертам.
Юрий Викторович депутат-влаклан пырля тыршаш кӱлмым ойлен:
‒ Икте-весым колын, умылен пашам ыштымеке гына сай лектышыш шуаш, кундемыште илышым саемдаш лиеш. Кеч исполнительный, кеч законодательный власть лийже — калыклан ойыртем уке. Ме нунын илышыштым куштылемдышаш улына.
Сессийыште депутат-влак Звенигово да Медведево судебный район-влакын судебный участкыштын мировой судьяштым О.Веретенниковам да А.Яковлевым пеҥгыдемденыт.
Марий Эл Республикысе посна категориян еҥ-влаклан социальный полышым пуымо шотышто законыш вашталтышым пуртымо. Ветеран, тылын труженикше, да икмыняр молыланат, шуко йочан еш гыч студент да тунемше-влаклан тӱлымӧ компенсацийым кугемдыме.
Депутат-влак тыгак Килемар районысо Йылейӓл, Нежныр, Шорокундыш ял илемым, ола шотан Килемар илемым ушымо верч йӱкленыт. Тыгай темлымашым тушто илыше калык ыштен.
Сессийыште Марий Эл Республикыште айдемын праваже шотышто уполномоченныйын 2021 ийысе паша лектышыж дене палыме лийыныт, республикыште ӱмаште законодательстве паша кузе шукталтме шотышто докладым колышытыныт.
Э.Иманаев.
